Клецк застаўся без вады

• 29.01.2026, 23:08

Не вытрымалі трубы 1974-га года.

Жыхары Клецка сутыкнуліся з сур'ёзнымі праблемамі з водазабеспячэннем з-за шэрагу аварый на водаправодных сетках. Уначы горад увогуле застаўся без вады, піша «Мінская праўда».

Як патлумачыў намеснік старшыні Клецкага райвыканкама Ігар Давыдок, першыя праблемы ўзніклі яшчэ ў нядзелю. Тады адбыўся прарыў трубаправода ў аграгарадку Янавічы, які ўваходзіць у адзіную з Клецкам сістэму водазабеспячэння. Гэта адразу павялічыла нагрузку на гарадскія сеткі. У панядзелак сітуацыя ўскладнілася яшчэ больш — аварыйны разрыў адбыўся на вуліцы Савецкай у Клецку.

Дзве аварыі прывялі да рэзкага падзення ўзроўню вады ў накапляльных рэзервуарах Клецкага ўчастка «Салігорскводаканала». Вада са свідравін у урочышчы Старына не паспявала папаўняць запасы, і рэзервуары фактычна апусцелі. Удзень, калі большасць людзей была на працы і спажыванне вады знізілася, узровень удалося часткова аднавіць.

Аднак увечары сітуацыя зноў стала крытычнай: спажыванне вады рэзка ўзрасла, а насоснае абсталяванне не змагло забяспечыць патрэбны аб'ём з-за ўтварэння паветраных коркаў у сістэме. Па словах Ігара Давыдка, гораду не хапіла каля тысячы кубаметраў вады, каб задаволіць патрэбы насельніцтва.

Да раніцы водазабеспячэнне ўдалося аднавіць. Але ўжо ўвечары таго ж дня адбыўся чарговы прарыў — цяпер на вуліцы Перамогі, і Клецк зноў застаўся без вады.

Аварыйныя службы аператыўна працуюць на месцы і абяцаюць як мага хутчэй ліквідаваць праблему.

Адна з галоўных прычын аварый — неспрыяльныя ўмовы надвор'я: рэзкія перапады тэмператур значна павялічваюць нагрузку на трубы і паскараюць іх разбурэнне. Акрамя таго, сваю ролю сыграў і натуральны знос металу — трубы на гэтым участку былі пракладзены яшчэ ў 1974 годзе, і за дзесяцігоддзі ўздзеянне глебы прывяло да іх істотнага аслаблення.

Раней падобная сітуацыя адбылася ў Мінску, але там 19 студзеня была пашкоджана цеплавая магістраль, у выніку чаго знікла гарачая вада. Ліквідацыя гэтай аварыі зацягнулася на некалькі дзён, цалкам аднавілі цеплазабеспячэнне і падачу гарачай вады толькі да 22 студзеня.

Таксама ў гэтыя дні аварыі на цеплатрасах і цепласетках адзначаліся ў Гомелі, Барысаве, Смалявічах, Віцебску.