На Палессі зляпілі снегавіка ў два чалавечыя росты

• 29.01.2026, 21:10

Фотафакт.

Жыхар вёскі Манькавічы ў Столінскім раёне разам з дзвюма дачкамі зляпіў вялікага снегавіка. Вышыня снежнай скульптуры складае амаль чатыры метры, піша мясцовае дзяржаўнае выданне «Навіны Палесся».

У вёсцы Манькавічы на Століншчыне Леанід Філановіч разам са сваімі дачкамі Міланай і Леанай зляпіў гіганцкага снегавіка вышынёй амаль чатыры метры.

На стварэнне пайшла ўся ноч — мужчына пачаў працу ў 9 вечара 27 студзеня, а скончыў толькі каля 4 раніцы наступнага дня. Раней ён таксама ляпіў снежных гігантаў, але на ўнутраным двары — і людзі пастаянна прасілі дазвол зайсці, каб паглядзець і сфатаграфавацца.

«Сёлета я адразу вырашыў зрабіць снегавіка за гародам, каля дома, — дзеліцца Леанід. — Няхай кожны ахвотны можа свабодна падысці, сфатаграфавацца і парадавацца. Усё гэта ў першую чаргу для дзяцей».

І гэта не канчатковы варыянт. Леанід плануе яшчэ папрацаваць над рысамі твару снежнага волата.

«Першы шар атрымаўся 2 м. Плюс яшчэ два шары на ім. Дзесьці 4,5 м будзе снегавік, — мяркуе жыхар Манькавічаў. — Колькі мог каціць шар — каціў. Пакінуў яго на месцы, дзе вырашыў размясціць снегавіка. Потым яшчэ шары зрабіў, злучыў іх, акругліў. Для апошняга па лесвіцы насіў снежныя шары і злучаў іх уверсе».

Паводле слоў Леаніда, у гэты момант ён, як у дзяцінстве, адчуваў радасць.