У ходзе чысткі ад ШІ-кантэнту YouTube выдаліў каналы з мільёнамі падпісчыкаў

• 29.01.2026, 19:06

Платформа скарачае распаўсюджанне нізкаякаснага ШІ-кантэнту, узмацняючы барацьбу са спамам.

YouTube выдаліў адразу некалькі найбуйнейшых каналаў з так званым нізкаякасным ШІ-кантэнтам. Як вынікае з справаздачы сэрвісу Kapwing, з платформы знік самы папулярны канал такога кшталту — CuentosFacianantes. Ён меў больш за 5,9 млн падпісчыкаў і сабраў звыш 1,2 млрд праглядаў. Пра гэта паведамляе выданне The Verge.

У лістападзе 2025 года Kapwing называў CuentosFacianantes самым папулярным каналам з ШІ-кантэнтам, адзначаючы, што ён рэгулярна публікаваў нізкаякасныя ролікі на тэму Dragon Ball. Таксама стаў недаступным канал Imperio de Jesus, які займаў другое месца ў рэйтынгу і меў больш за 5,8 млн падпісчыкаў.

Акрамя таго, яшчэ 16 каналаў са спіса Kapwing або былі выдаленыя, або пазбавіліся ўсяго кантэнту, сярод іх Hеroes de Fantasia, Adhamali-0 і Roupa25. Канал Super Cat League фармальна застаецца на платформе, аднак усе відэа з яго зніклі. Усе гэтыя каналы мелі аўдыторыю больш за 2 млн падпісчыкаў.

На дадзены момант незразумела, ці былі гэтыя каналы выдаленыя непасрэдна самім YouTube і калі менавіта гэта адбылося. Рэдакцыя The Verge звярнулася ў кампанію па тлумачэннях, але адказу не атрымала.

Разам з тым у The Verge звярнулі ўвагу, што сітуацыя разгортваецца на фоне заяў генеральнага дырэктара YouTube Ніла Мохана пра намер скараціць распаўсюджанне нізкаякаснага ШІ-кантэнту, узмацніўшы барацьбу са спамам і клікбэйтам.