Навукоўцы раяць слухаць музыку

• 29.01.2026, 11:37

І называюць яе «лекам».

Даследчыкаў цікавіла, ці можа музыка дапамагаць людзям з клінічнымі сімптомамі трывожнасці адчуваць сябе лепш. Каманда правяла эксперымент, вынікі якога апублікаваныя ў часопісе PLOS Mental Health, як адзначае «Нож».

У даследаванні бралі ўдзел 144 чалавек, якія прымалі прынамсі адзін прэпарат ад трывожнасці. Усіх выпрабаваных выпадковым чынам падзялілі на дзве групы.

Добраахвотнікі з першай групы слухалі так званы ружовы шум — бесперапынны паток гукаў, якія нагадваюць шум вадаспаду. Астатнія ўдзельнікі на працягу 12, 24 або 36 хвілін услухоўваліся ў розныя музычныя трэкі, якія суправаджаліся рытмічнай слыхавай стымуляцыяй.

У выніку ў выпрабаваных з другой групы выявілі значнае зніжэнне сімптомаў трывогі. Што цікава, найлепш сябе адчувалі тыя, хто слухаў музыку 24 хвіліны. Пры гэтым у добраахвотнікаў, якія знаходзіліся ў асяроддзі «ружовага шуму», не зафіксавалі статыстычна значных паляпшэнняў.

«Гэта даследаванне пацвярджае гіпотэзу пра тое, што праслухоўванне музыкі можа знізіць узровень сітуацыйнай трывожнасці ў людзей з клінічна значным узроўнем асабістай трывожнасці», — падсумавалі аўтары навуковага артыкула.