Такаеў: Праз Казахстан «адмылі» амаль $14 млрд з сумежнай краіны

• 28.01.2026, 20:13

СМІ пішуць пра Расію.

Мінулым годзе праз банк Казахстану з сумежнай краіны «перагналі» каля $14 млрд у іншыя краіны. Пра гэта 28 студзеня на нарадзе, прысвечанай барацьбе з фінансавымі злачынствамі, заявіў прэзідэнт Казахстану Касым-Жамарт Такаеў, яго цытуе КазТАГ.

«Старшыня [Агенцтва па фінансавым маніторынгу Жанат] Эліманаў нядаўна далажыў мне пра дзеянні аднаго з казахстанскіх банкаў, праз які з сумежнай краіны ў 2025 годзе «перагналі» больш за 7 трлн тэнге (больш за $13,89 млрд паводле курсу Нацбанка Казахстану) ў іншыя краіны», — распавёў Такаеў.

Ён адзначыў, што «з пункту гледжання закона, эканомікі, нават палітыкі» гэта — «абурлівы факт».

«На жаль, фактаў падобнага кшталту, што датычацца махлярскіх фінансавых схем, па-ранейшаму нямала», — прызнаў Такаеў.

Пра якую менавіта краіну ідзе гаворка, прэзідэнт Казахстану не ўказаў. The Moscow Times піша, што Такаеў у сваім выступленні адназначна намякаў на краіну-агрэсара РФ.

Заява прэзідэнта Казахстану прагучала на фоне ўзмацнення фінансавага кантролю ў верасні мінулага года ў дачыненні да расіян, якія дыстанцыйна аформілі банкаўскія карткі ў гэтай краіне.

Агенцтва па рэгуляванні і развіцці фінансавага рынку Казахстану паведамляла, што ў 2024 годзе больш за 90% уладальнікаў картак, якія выкарыстоўваліся для адмывання злачынных даходаў, былі нерэзідэнтамі. Так, за год было зафіксавана 6,2 тыс. выпадкаў выкарыстання «дроп-карт» на суму 24 млрд тэнге (звыш $47 млн).

Масавае дыстанцыйнае афармленне картак казахстанскіх банкаў расіянамі пачалося пасля ўвядзення санкцый супраць РФ, адзначае The Moscow Times.