Навукоўцы расказалі, чаму грушу трэба ёсць са скуркай

• 28.01.2026, 9:07

У яе ёсць карысная ўласцівасць.

Паліфенолы, што змяшчаюцца ў скурцы грушы, здольныя зніжаць запаленне ў кішэчніку і абараняць яго слізістую абалонку пры язвавым каліце. Да такой высновы прыйшлі навукоўцы з Цзянсускай акадэміі сельскагаспадарчых навук (Кітай). Вынікі даследавання апублікаваныя ў часопісе Food & Function (F&F).

У лабараторных эксперыментах гэтыя рэчывы прыгняталі выпрацоўку празапаленчых малекул у імунных клетках. У доследах на мышах з індукаваным калітам даданне паліфенолаў са скуркі грушы памяншала страту масы цела, зніжала ўзровень запалення ў крыві і змяншала ступень пашкоджання тканак тоўстай кішкі.

Асобна даследчыкі вывучылі ўплыў злучэнняў на кішэчную мікрабіёту. Пад іх дзеяннем павялічвалася бактэрыяльная разнастайнасць і расла доля мікраарганізмаў, звязаных з падтрыманнем цэласнасці слізістай абалонкі кішэчніка. У той жа час колькасць бактэрый, асацыяваных з запаленнем, скарачаўся.

Паралельна зніжалася залішняя актыўнасць імунных рэакцый у слізістай абалонцы, уключаючы шляхі, што адказваюць за распазнаванне антыгенаў. Антыгены — гэта любыя рэчывы, якія імунная сістэма распазнае як «чужыя» — напрыклад, мікрабы, часціцы ежы або бялкі.

Калі імунітэт сустракае антыген, ён звычайна рэагуе ахоўнай рэакцыяй. У кішэчніку пры язвавым каліце імунныя клеткі занадта актыўна рэагуюць на антыгены, нават калі гэта бяскрыўдныя рэчывы або карысныя бактэрыі. Гэта выклікае пашкоджанне слізістай і запаленне.

Аўтары адзначаюць, што атрыманыя дадзеныя сведчаць пра важную ролю скуркі пладоў у падтрыманні здароўя кішэчніка. На іх думку, грушавую скурку можна разглядаць як перспектыўны функцыянальны харчовы кампанент, аднак для пацвярджэння ахоўнага эфекту ў людзей неабходныя клінічныя даследаванні.