У цэнтры Вільнюса прызямліўся кантрабандны шар з беларускімі цыгарэтамі

• 28.01.2026, 10:26

Мужчына, які прыехаў па груз, параніў паліцэйскага.

У цэнтры Вільнюса прызямліўся кантрабандны шар, а чалавек, які прыехаў па груз, параніў супрацоўніка паліцыі і ўцёк, паведаміў у сераду Дэпартамент паліцыі Літвы.

Паводле папярэдніх звестак, у 21:00 па мінскім часе паліцэйскія атрымалі паведамленне, што ў Вільнюсе, на вуліцы Карэйвю, каля ракі, прызямліўся метэаралагічны шар, меркавана з кантрабанднымі цыгарэтамі, паведамляе LRT.

А 22:00 па мінскім часе да выяўленай скрынкі пад'ехаў аўтамабіль Mercedes-Benz ML350 4MATIC. Мужчына, які выйшаў з машыны, накіраваўся да грузу, аднак, заўважыўшы паліцэйскіх, пабег і ўскочыў назад у аўтамабіль.

Пакідаючы месца здарэння, аўтамабіль зачапіў супрацоўніка паліцыі Віленскага ўезда ў форме, 2000 года нараджэння. Паліцэйскі па медыцынскую дапамогу не звяртаўся.

На месцы здарэння было выяўлена і канфіскавана 1500 пачак цыгарэт «NZ Gold» з беларускімі акцызнымі маркамі.

З-за пагрозы, звязанай з кантрабанднымі шарамі з Беларусі, учора ўвечары некалькі разоў уводзіліся абмежаванні на палёты ў Вільнюскім аэрапорце. Паветраную прастору над аэрапортам часова закрывалі дзеля забеспячэння бяспекі грамадзянскай авіяцыі, пасажыраў і насельніцтва — службы фіксавалі навігацыйныя адзнакі, уласцівыя палётам метэаралагічных шароў.