У мінчукоў масава лопаюцца батарэі

• 27.01.2026, 20:47

Новая напасць гэтай зімы.

У жыхароў заходніх і паўднёвых раёнаў Мінска — новыя камунальныя праблемы.

Раніцай 27 студзеня ў некаторых пад'ездах шматкватэрных дамоў у Фрунзенскім і Маскоўскім раёнах лопнулі батарэі, пішуць «Мінск-Навіны».

Праблема закранула шматпавярхоўкі адразу па некалькіх адрасах. Сярод іх — другі пад'езд дома №44 на вуліцы Якубоўскага. На кадрах — ручай гарачай вады, што выцякае проста з пад'езда.

Аўтар відэа кажа, што з-за аварыі людзі не маглі выйсці на вуліцу.

Радыятар на першым паверсе ўначы папросту размарозіўся.

«Ацяпленне ў кватэрах… працуе ў аўтаматычным рэжыме. Цеплазабеспячэнне ажыццяўляецца ў адпаведнасці з тэмпературным графікам і тэмпературай вонкавага паветра», — патлумачылі ў адміністрацыі раёна.

На гэтай жа вуліцы падобную карціну назіралі і жыхары трэцяга пад'езда дома №26/1. Патоп адбыўся таксама па адрасах: Слабадская, 73, Пімена Панчанкі, 62 і Адзінцова, 107 — паўсюль у пад'ездах лопнулі батарэі.

«Уначы мы засталіся без святла. На восьмым паверсе дома прарвала батарэю з гарачай вадой. З сёмай гадзіны раніцы званіла на 115. Аварыйная машына прыехала толькі каля 10:00. Цяпер у адной частцы кватэры батарэі грэюць, у другой — не», — цытуе агенцтва адну з мінчанак.

Яшчэ адзін непрыемны інцыдэнт адбыўся на Маякоўскага, 154.

У трэцім пад'ездзе на ўваходзе таксама лопнула батарэя, ад чаго струмені кіпятку не толькі падтопілі месцы агульнага карыстання, але і пэўны час перашкаджалі медыкам хуткай прайсці ў кватэру па выкліку.

Паведамляецца, што да вечара 27 студзеня мінчане больш за 200 разоў паведамілі пра цечу ў ацяпляльных прыборах у пад'ездах і дапаможных памяшканнях.