Беларусы паказалі, у што ператварыў дарогі цыклон «Леоні»

• 27.01.2026, 16:24

Замест тратуараў і праезнай часткі — «люстэрка».

«Цукровая глазура» на аўтамабілях і «люстэрка» замест тратуараў і праезнай часткі — з такой няпростай рэальнасцю сёння давялося сутыкнуцца многім беларусам, якія не маюць магчымасці застацца дома ў ненадвор'е.

Прычынай стаў цыклон «Леоні», і, на жаль, ён вырашыў затрымацца ў Беларусі, піша «Тэлеграф».

Так, для многіх беларускіх аўтамабілістаў раніца пачалася з непрыемнай карціны, якую звычайна ўбачыш хіба што ў вірусных інтэрнэт-роліках. Ледзяны дождж, які ішоў з вечара, пакрыў многія машыны ледзяной каркай, падарыўшы аўтамабілістам другое шкло.

На жаль, на гэтым прыгоды аўтамабілістаў не заканчваліся. Тых, каму ўдалося адтаяць свае ледзяныя машыны, чакала прыкладна такая ж дарога. На ўчастках, да якіх яшчэ не дабраліся дарожнікі і камунальнікі з пясчана-солевымі сумесямі, дарога ператваралася ў каток або «проста люстэрка», як выказаўся аўтар аднаго з ролікаў.

Мужчына паказаў, што не ўсім машынам удаваўся гэты квест — пераадолець нават мінімальны ўздым на шляху, калі ўчастак аказваўся закатаны ў лёд: фуры і аўтобусы ў адзін момант проста спыняліся, не ў стане прасунуцца далей.

Іншы аўтамабіліст і ўвогуле параіў «калегам» сто разоў падумаць, перш чым сёння сядаць за руль. Мужчына прадэманстраваў поўную адсутнасць счэплення на абледзянелай каляіне на трасе, якую не паспелі апрацаваць соллю.

Тым жа, хто ўсё ж рызыкнуў, на жаль, не заўсёды шанцавала, судзячы па вялікай колькасці ранішніх аварыяў.

Не лягчэй даводзіцца і пешаходам. Так, гамяльчанка паказала, у якое выпрабаванне ператварыўся раніцай шлях да працы.

«Гэта проста жывы лёд, усё блішчыць. Немагчыма ісці», — папярэдзіла жанчына.

Дарэчы, аранжавы ўзровень небяспекі з-за небяспечнай галалёдзіцы Белгідрамет падоўжыў яшчэ на суткі, да вечара 28 студзеня, для чатырох абласцей Беларусі, а на Гродзеншчыне і Берасцейшчыне да гэтага часу сітуацыя пачне паляпшацца, але ўсё яшчэ захаваецца на патэнцыйна небяспечным узроўні.