У Гродне дзеці гулялі па замёрзлым Нёмане

• 27.01.2026, 15:46

Мясцовыя жыхары б'юць трывогу.

Чытачы Newgrodno.by знялі іх на відэа і просяць бацькоў прыгледзецца, ці не іх гэта дзеці.

Сёлета зіма сапраўдная, марозная. Шмат вадаёмаў скутыя лёдам.

«Спецыялісты кажуць, што калі яго таўшчыня больш за 7 см, то выходзіць на цвёрдую ваду бяспечна. Але ў выпадку з Нёманам, здаецца, такія метады не заўсёды працуюць», — піша партал.

Рака ў раёне Гродна апошнія некалькі гадоў не замярзае нават у наймацнейшыя маразы. Толькі па краях, дзе цячэнне спакойнае, можна заўважыць ледзяную скарынку.

Мясцовыя падлеткі не пабаяліся праваліцца пад нетрывалы лёд і ў выхадныя прагуляліся ўздоўж берага Нёмана.

Гэта знялі неабыякавыя гродзенцы.

«Магчыма, хтосьці з бацькоў пазнае сваіх дзяцей і правядзе гутарку пра небяспеку такіх гульняў і прагулкаў», — адзначыла чытачка.

Усё адбылося ў раёне Румлёўскага моста з боку жылога масіва па вуліцы Лідскай.