У расійскім Мурманску трэція суткі перабоі з электрычнасцю і падачай цяпла

• 27.01.2026, 12:27

Гэта найбуйнейшы горад за Палярным кругам — і цяпер там мароз.

Мурманск і Мурманская вобласць РФ, уключаючы горад Севераморск, з 23 студзеня часткова абясточаныя з-за аварыі на лініях «Россетей». Пяць апор ліній электраперадачы (ЛЭП) абрынуліся праз абледзяненне, мяцеліцу і шквалісты вецер. Адключэнне электрычнасці прывяло да спынення працы кацельняў — жыхары Мурманскай вобласці засталіся без ацяплення і гарачай вады. Паводле апошніх ацэнак урада вобласці, без электразабеспячэння застаюцца каля 73 тысяч жыхароў рэгіёна. Улады спрабуюць аднавіць электразабеспячэнне, усталёўваючы часовыя апоры ЛЭП. У рэгіёне ўвялі рэжым надзвычайнай сітуацыі. На поўнае аднаўленне электразабеспячэння пасля аварыі можа спатрэбіцца не менш як тыдзень, заявіў губернатар Андрэй Чыбіс. Паводле яго слоў, на трэція суткі блэкаўту электразабеспячэнне аднавілі ў 80% дамоў Мурманска і Севераморска. Мясцовыя жыхары ў сацсетках не згодныя з ацэнкай кіраўніка рэгіёна, піша «Медуза».

Жыхары Мурманска і Севераморска — гарадоў, што знаходзяцца за Паўночным палярным кругам, — трэці дзень паведамляюць пра маштабныя адключэнні электрычнасці і цяпла. Увесь гэты час у Мурманску, паводле даных «Яндекс Погоды», тэмпература паветра ўдзень зніжалася да -10 °C, уначы — да -17 °C.

Адключэнні пачаліся 23 студзеня, пасля таго як у «Россетях» патлумачылі, у рэгіёне абрынуліся пяць апор ліній электраперадачы. Прычынай абрынання кампанія назвала надвор’е: мокры снег, моцны вецер і абледзяненне апор ЛЭП.

Следчы камітэт заявіў, што ўпалыя апоры эксплуатаваліся з 1960–1980-х гадоў. Пры гэтым тэрмін эксплуатацыі такіх канструкцый — 40 гадоў. Пасля гэтага кожныя пяць гадоў яны павінны праходзіць праверкі. Следчыя высвятляюць, як менавіта праходзілі гэтыя праверкі. Узбуджаная крымінальная справа па артыкуле аб нядбайнасці (частка 1 артыкула 293 КК РФ). Паводле версіі следства, адказныя супрацоўнікі «Россетей» не прынялі мер для ўтрымання ліній электраперадачы ў належным стане, а таксама аператыўна не адрэагавалі на аварыйныя адключэнні.

У першыя суткі ўладам рэгіёна не ўдалося цалкам вырашыць праблему. У суботу, 24 студзеня, у некаторых дамах Мурманска ўвялі веерныя адключэнні, а ўжо на наступны дзень у рэгіёне абвясцілі рэжым надзвычайнай сітуацыі. Паводле слоў губернатара Андрэя Чыбіса, спецыялісты «Россетей» працуюць кругласутачна, але сітуацыя «ўскладняецца неспрыяльнымі ўмовамі надвор’я і надзвычай складаным рэльефам мясцовасці».

26 студзеня «Россети» адзвітаваліся пра ўстаноўку двух часовых драўляных апор ЛЭП на замену тых, што абрынуліся. Часткі апор дастаўляюць да месца ўстаноўкі на ўсюдыходах, потым збіраюць на зямлі і ўсталёўваюць, у тым ліку з дапамогай верталёта, распавялі ў кампаніі. Для поўнага завяршэння работаў па ўсталёўцы і падключэнні асноўных апор ЛЭП спатрэбіцца тыдзень, паведаміў Чыбіс.

З-за блэкаўту намаганнямі прадпрымальнікаў і ўладаў у пацярпелых населеных пунктах адкрылі пункты для зарадкі тэлефонаў, доступу да кіпеню і разагрэву ежы. Там утвараюцца чэргі. У Мурманску ў такіх пунктах падтрымкі выдаюць прадуктавыя наборы, але не ўсюды іх хапае. Праезд у аўтобусах для жыхароў Мурманска і Севераморска зрабілі бясплатным. Частка навучальных устаноў прыпыніла працу або перайшла на дыстанцыйны рэжым.

Усяго з-за аварыі толькі ў Мурманску больш за тысячу дамоў апынуліся пад пагрозай замярзання сістэм цеплазабеспячэння, распавёў губернатар. Паводле яго слоў, да 26 студзеня ўсе жылыя дамы і сацыяльныя аб’екты забяспечаныя цеплам і вадой, а ў 80% дамоў Мурманска і Севераморска — стабільнае электразабеспячэнне.

Мясцовыя жыхары ў каментарах пад пастамі ў тэлеграм-канале губернатара не згодныя з гэтай ацэнкай. Некаторыя каментатары сцвярджаюць, што ў Севераморску «палова горада без святла». Напярэдадні мясцовыя ўлады паведамлялі, што да вечара 25 студзеня без святла ў горадзе застаюцца 117 дамоў.

Адна з чытачак выдання 51.ru распавяла: «Гатуем на газавай гарэлцы. У кагосьці вады і ацяплення няма дагэтуль, у кагосьці нешта аднавілі, але ўсё пастаянна адключаецца. Графіка падачы электраэнергіі няма. Пра яго толькі кажуць, што ён нібыта існуе, але яго ніхто не бачыў». Па яе словах, з-за пастаянных адключэнняў і холаду яна з малым дзіцем вымушаная з’язджаць з дому да сваякоў або ў гасцініцу.

На тле адключэнняў электрычнасці з’явіліся паведамленні (1,2,3) пра збоі ў працы мабільнага інтэрнэту і мэсэнджара Telegram у рэгіёне. Аднак з чым менавіта яны звязаныя — з адключэннямі святла ці з дзеяннямі ўладаў, — невядома.

Намесніца губернатара Вольга Воўк сцвярджае, што без святла ў рэгіёне застаюцца каля 73 тысяч чалавек. «Але яны не пастаянна без святла, мы іх пераключаем. Дамоў, якія зусім доўга застаюцца без электразабеспячэння, няма», — заявіла яна.

Усе ключавыя аб’екты Мурманскай вобласці, уключаючы стратэгічныя прадпрыемствы, як сцвярджаюць улады, забяспечаныя электрычнасцю. Раней паведамлялася, што адключэнні закранулі і галоўную ваенна-марскую базу Паўночнага флоту Расіі. Караблі перавялі на аўтаномны рэжым энергазабеспячэння.

Федэральныя тэлеканалы, нягледзячы на маштабныя і працяглыя адключэнні, практычна не асвятляюць сітуацыю ў Мурманскай вобласці, адзначае «Агенцтва». Так, за выхадныя і раніцу панядзелка паўнавартасны сюжэт пра тое, што адбываецца ў рэгіёне, паказаў толькі тэлеканал «Расія 1» і толькі адзін раз — раніцай 24 студзеня. Рэпартаж заняў менш за дзве хвіліны ў навінавым выпуску.