Герасімаў зноў хлусіць
- 27.01.2026, 11:41
Кіраўнік Генштаба РФ абвясціў пра захоп горада, да якога расійская армія нават не падышла.
Кіраўнік расійскага Генштаба Валерый Герасімаў заявіў, што расійскія войскі захапілі горад Купянск-Вузлавы ў Харкаўскай вобласці. Згодна з мапамі OSINT-аналітыкаў, расійскія вайскоўцы нават не падышлі да гэтага населенага пункта. Адразу некалькі расійскіх праваенных тэлеграм-каналаў звярнулі ўвагу на недаставернасць заявы Герасімава, піша «Агентство».
Сваю заяву Герасімаў зрабіў падчас інспекцыі групоўкі войскаў «Захад», відэа з якой раніцай у аўторак апублікавала Мінабароны. Паводле яго слоў, Купянск-Вузлавы «вызвалены», і расійскія вайсковыя цяпер «ажыццяўляюць праверку і зачыстку гарадскіх кварталаў».
На гэтую заяву звярнулі ўвагу некалькі z-каналаў. «Мы, мабыць, пойдзем пакурыць пасля такога прыгожага дакладу. Маўчкі», — напісаў z-канал «Два маёры».
Аўтар z-канала «Romanov Лайт» Уладзімір Раманоў назваў заяву Герасімава вынікам «закрасаў», маючы на ўвазе практыку абвяшчаць пра прасоўванні, што не адпавядаюць рэчаіснасці.
Прарэсійскі тэлеграм-канал «Белорусский силовик» апублікаваў мапу, на якой правёў чорным колерам мяжу тэрыторыі пад кантролем ЗСУ і падкрэсліў сінім населеныя пункты, якія, мякка кажучы, не зусім пад нашым кантролем. З мапы вынікае, што расійская армія не падышла да Купянска-Вузлавага.
Паводле звестак набліжанага да ўкраінскага Мінабароны DeepState, ад Купянска-Вузлавага да тэрыторыі, якую кантралююць расійскія вайскоўцы, не менш за 10 км па прамой. Фінская Blackbird таксама пацвярджае, што да межаў горада яшчэ не падышла «шэрая зона». Згодна з мапай амерыканскага Інстытута вывучэння вайны (ISW, чацвёртае фота), населены пункт цалкам пад кантролем Украіны.
Купянск-Вузлавы знаходзіцца прыкладна ў пяці кіламетрах на поўдзень ад Купянска. Пра захоп Купянска Герасімаў паведамляў Уладзіміру Пуціну яшчэ ў лістападзе 2025 года. Насамрэч цалкам захапіць гэты горад расійскім вайскоўцам так і не ўдалося, пра што сведчылі мапы OSINT-аналітыкаў. А напрыканцы снежня расійскія вайскоўцы страцілі кантроль нават над ужо захопленымі ўчасткамі ў горадзе.