«Самі вінаватыя»

• 26.01.2026, 18:25

Z-прапагандыст заявіў, што жыхары Белгарадскай вобласці павінны самастойна забяспечваць сябе электрычнасцю.

Расійскі прапагандыст «Салаўёў LIVE» Сяргей Мардан выступіў з рэзананснай заявай, у якой абвінаваціў жыхароў Белгарадскай вобласці ў перабоях з электразабеспячэннем. Прычынай сталі скаргі мясцовых жыхароў на блекауты ў рэгіёне. Пра гэта паведамляе «Дыялог».

Мардан фактычна пераклаў адказнасць за адсутнасць базавых умоў жыцця на саміх грамадзян. Паводле яго слоў, рэкамендацыя губернатара Белгарадскай вобласці пра самастойнае забеспячэнне дамоў электраэнергіяй з’яўляецца апраўданай.

«Губернатар Белгарадскай вобласці параіў жыхарам самастойна забяспечваць свае дамы электрычнасцю. Я лічу гэтае рашэнне апраўданым і справядлівым. У краіны цяпер ёсць задачы важнейшыя, чым бытавыя нязручнасці асобных рэгіёнаў. Калі ты жывеш у прыгранічнай зоне, ты павінен быць гатовы забеспячваць сябе сам, а не чакаць, што дзяржава прынясе ўсё на талерцы», — заявіў Мардан.

Пазней прапагандыст усклаў адказнасць за тое, што адбываецца, на саміх мірных жыхароў, абвінаваціўшы іх у тым, што яны нібыта пакінулі рэгіён і не абаранілі яго ад наступстваў вайны.

«Белгарад сам ва многім вінаваты.

Жыхары разбегліся, не абараніліся, пабрасалі дамы. А потым раптам узгадалі пра ўладу. Спачатку ўцякаюць, а потым пытаюцца, дзе электрычнасць, дзе генератары. Мы жывём у новай рэальнасці. Выжывае не той, каму павінны, а той, хто спраўляецца сам», — дадаў ён.