Гомельскае прадпрыемства вырашыла зарабіць на вайне

• 26.01.2026, 18:06

«Луч» становіцца законнай ваеннай мішэнню ЗСУ.

Гомельскае канструктарскае бюро «Луч» плануе правесці рэканструкцыю складскога памяшкання і пераабсталяваць яго ў вытворчы цэх па выпуску буйнагабарытных антэнных металаканструкцый ваеннага прызначэння. Пра гэта паведамляе выданне «Флагшток» са спасылкай на даныя абвешчанага тэндэру.

Паводле перадпраектнай дакументацыі, прыблізны кошт працаў перавышае 7 млн рублёў (каля 2,5 млн долараў). У межах праекта прадугледжана рэканструкцыя склада плошчай 877 квадратных метраў, а таксама будаўніцтва прыбудовы для размяшчэння кампрэсарнага абсталявання.

Праектная магутнасць будучага цэха ацэньваецца ў чатыры буйнагабарытныя металічныя канструкцыі на год. Чаканая выручка ад іх рэалізацыі можа скласці 9,47 млн рублёў (больш за 3,3 млн долараў). Пачаць будаўнічыя работы плануецца ў верасні 2026 года.

На сайце прадпрыемства пазначана, што КБ «Луч» займаецца распрацоўкай і вытворчасцю антэнна-фідэрных прылад і іх кампанентаў. Запуск новага цэха стане пашырэннем дзеючых вытворчых магутнасцяў.

Гомельскае канструктарскае бюро «Луч» уваходзіць у склад холдынгу «Сістэмы радыёлакацыі», які належыць Дзяржаўнаму ваенна-прамысловаму камітэту.