У Венесуэле вызвалілі як мінімум 104 палітычных вязняў

• 26.01.2026, 17:26

Але многія вязні сумлення ўсё яшчэ знаходзяцца ў турмах.

У Венесуэле ў межах працэсу вызвалення з месцаў пазбаўлення волі, што працягваецца, былі вызваленыя прынамсі 104 чалавекі. Пра гэта паведаміў кіраўнік групы Foro Penal Альфрэда Рамэра у сацыяльных сетках, піша агенцтва Reuters (пераклад — сайт Charter97.org).

Па словах Рамэра, вызваленыя былі выпушчаныя з турмаў па ўсёй краіне, і іх колькасць можа яшчэ павялічыцца, паколькі праверка працягваецца. Праваабаронца таксама адзначыў, што было б пажадана, каб урад апублікаваў афіцыйныя спісы вызваленых.

У ліку вызваленых апынуліся, у прыватнасці, адвакат арганізацыі Foro Penal Кэнэдзі Тэхеда і студэнт сувязі Хуан Францыска Альвараду, якіх, паводле звестак групы, раней утрымлівалі па палітычна матываваных абвінавачваннях.

Выконваючая абавязкі прэзідэнта Венесуэлы Дэльсі Радрыгес раней заяўляла, што з канца снежня з турмаў былі вызваленыя 626 зняволеных, але яна не ўдакладніла, за які перыяд адбываліся гэтыя вызваленні. Foro Penal адзначае, што пацверджаная колькасць палітычных вязняў, выпушчаных з 8 студзеня, значна ніжэйшая за афіцыйную лічбу.

Радрыгес таксама паведаміла, што плануе звязацца з Вярхоўным камісарам ААН па правах чалавека Фолькерам Тюркам, каб папрасіць Арганізацыю Аб’яднаных Нацый праверыць спісы тых, хто быў вызвалены, і такім чынам павысіць празрыстасць працэсу.

Праваабарончыя групы адзначаюць, што колькасць палітычных вязняў у Венесуэле застаецца значнай, і многія сем’і ўсё яшчэ чакаюць вызвалення сваіх родных.