Каранік пайшоў супраць Лукашэнкі?

• 26.01.2026, 9:38

Крамольныя словы пра правал ідэі ўласнага легкавога электракара прагучалі непасрэдна ў эфіры тэлебачання.

Старшыня Прэзідыума Нацыянальнай акадэміі навук Беларусі Уладзімір Каранік прызнаў, што пры спробах стварыць уласны легкавы электракар беларускі бок пераацаніў свае магчымасці. Пра гэта ён заявіў 25 студзеня ў эфіры тэлеканала «Беларусь 1», перадае «Белсат».

Паводле слоў Уладзіміра Караніка, першапачаткова навуковая праграма была скіраваная не на стварэнне аўтамабіля цалкам, а на распрацоўку кампанентнай базы для электратранспарту — электрарухавікоў, рэдуктараў і інвертараў. Аднак задача стварыць паўнавартасны пасажырскі электрамабіль аказалася значна больш складанай, чым чакалася.

Ён адзначыў, што распрацоўшчыкі не да канца ўлічылі колькасць сістэм бяспекі, сілавы каркас і мультымедыйныя рашэнні, неабходныя для сучаснага легкавога аўтамабіля. Спроба інтэграваць айчынныя распрацоўкі ў былы бензінавы аўтамабіль, паводле яго слоў, не дала добрых спажывецкіх вынікаў.

«Задача была ў тым, каб для нашых вытворцаў падрыхтаваць айчынную кампанентную базу: электрарухавікі, рэдуктары, інвертары. Задачу стварыць аўтамабіль у цэлым — напэўна, крыху пераацанілі свае магчымасці. Не да канца разумелі, што пасажырскі аўтамабіль — гэта ўсё ж такі вельмі шмат сістэм бяспекі, гэта мультымедыя, гэта сілавы каркас. І спроба свае распрацоўкі адразу інтэграваць у былую бензінавую машыну, на жаль, не прывяла да добрага спажывецкага выніку», — сказаў старшыня Прэзідыума НАН.

Нагадаем, што размовы пра стварэнне ўласнага электрамабіля ў Беларусі вядуцца ўжо больш за 10 гадоў, але фактычнага поспеху так і не адбылося.

У межах праекта было задзейнічана шырокае кола прадпрыемстваў: у прыватнасці, цяговы электрарухавік распрацаваў і вырабіў завод «Магілёўліфтмаш». Аднак на пачатку 2025 года стала вядома, што праект вырашылі закрыць, бо разлікі паказалі: сабекошт электрамабіля з беларускіх камплектуючых быў бы занадта высокі нават пры дробнасерыйнай вытворчасці.