У Бундэстагу заклікалі ўзмацніць супрацьпаветраную абарону Украіны і перадаць ракеты Taurus

• 25.01.2026, 21:51

Атакі РФ на ўкраінскую грамадзянскую інфраструктуру з'яўляюцца разлічанымі.

Сустаршыня нямецкай апазіцыйнай партыі «Зялёныя» Францыска Брантнер заклікала ўрад Фрыдрыха Мерца узмацніць супрацьпаветраную абарону Украіны ў сувязі з павелічэннем расійскіх атак.

Пра гэта яна сказала ў інтэрв'ю агенцтву dpa.

Брантнер заявіла, што расійскі дыктатар Уладзімір Пуцін «не хоча міру — ён хоча закабалення».

Яна адзначыла, што атакі РФ на ўкраінскую грамадзянскую інфраструктуру з'яўляюцца разлічанымі, а не выпадковымі, таму Украіна мае права патрабаваць дадатковых сродкаў СПА ў сваіх партнёраў.

«Кіеў мае права патрабаваць дадатковай падтрымкі ў супрацьпаветранай абароне, і нямецкі ўрад павінен разам са сваімі еўрапейскімі партнёрамі знайсці спосаб, як можна аказаць больш дапамогі», — сказала дэпутатка.

Акрамя гэтага, Брантнер заклікала нямецкі ўрад перадаць Украіне крылатыя ракеты Taurus з далёкасцю больш за 500 кіламетраў як «важны сігнал палітычнай падтрымкі».