ЗША дэпартуюць некалькі дзесяткаў расіян

• 25.01.2026, 20:24

Першы рэйс ужо вылецеў у Маскву.

З ЗША вылецеў дэпартацыйны рэйс з расіянамі і іншымі ўцекачамі. Гэта першая такая высылка ў новым 2026 годзе.

Пра гэта паведамляе «Радыё Свабода».

«Сёння раніцай з Месы, штат Арызона, вылецеў дэпартацыйны рэйс, на борце якога знаходзяцца расіяне, якім адмовілі ў прытулку ў ЗША», — паведаміў выданню Дзмітрый Валуеў, кіраўнік арганізацыі Russian America for Democracy in Russia.

Паводле звестак СМІ, гэта ўжо пяты масавы рэйс за апошні год і першы ў новым 2026 годзе. Раней дэпартацыі расіян адбываліся ў чэрвені, жніўні і снежні.

Дакладная колькасць расіян на борце невядомая, але па стане на суботу да высылкі рыхтавалі каля 20 чалавек. Акрамя іх, гэтым рэйсам дэпартуюць таксама грамадзян Ірана і ўцекачоў з арабскіх краін.

Паводле слоў Валуева, перад адпраўленнем рэйса частку людзей, заяўкі якіх на статус уцекача яшчэ не разгледжаныя, з яго знялі. Некаторых расіян перад высылкай утрымлівалі ў перапоўненых камерах.