Беларусь страціла амаль 20 населеных пунктаў

• 25.01.2026, 19:03

У лідарах — Гомельшчына.

Штогод у Беларусі пераглядаюць межы населеных пунктаў. Адначасова рэгіструюцца новыя і скасоўваюцца старыя геаграфічныя аб’екты.

Журналісты партала Myfin.by звярнулі ўвагу на статыстыку за 2025 год, прадстаўленую ў бюлетэні «Змены найменняў геаграфічных аб’ектаў Рэспублікі Беларусь».

Адзін з раздзелаў якраз прысвечаны аб’ектам, што спынілі існаванне.

Адзначаецца, што некаторыя рашэнні прымаліся напрыканцы 2025 года, а ўступілі ў сілу ўжо на пачатку 2026-га.

Паводле даных, апублікаваных на сайце «Белгеадэзіі», у Беларусі летась вырашылі скасаваць амаль два дзясяткі геаграфічных аб’ектаў.

У Гомельскай вобласці: у Чачэрскім раёне — пасёлкі Аляксееўка, Бязбожнік, Заручча і Калініна, у Буда-Кашалёўскім раёне — пасёлак Мігай.

У Віцебскай вобласці: у Верхнядзвінскім раёне — вёскі Важаны, Давыдава, Заломы.

У Мінскай вобласці: у Уздзенскім раёне — вёска Малая Дашчанка.

Акрамя таго, зніклі некаторыя сельсаветы. Напрыклад, Варноўскі ў Кармянскім раёне — населеныя пункты перададзены ў Карацькоўскі сельсавет.

Населеныя пункты Арэхаўскага сельсавета ў Маларыцкім раёне перададзены ў Алтушскі сельсавет.

Таксама спыніў існаванне чыгуначны прыпыначны пункт Разлогі (Пастаўскі раён).