СМІ: Ёсць прасоўванне ў важным пытанні на перамовах у Абу-Дабі

• 25.01.2026, 9:40

Але гэта не пытанне тэрыторый.

Падчас перамоў паміж дэлегацыямі Украіны, ЗША і РФ у Абу-Дабі дэлегацыі сустрэліся ў пашыраным складзе, пасля чаго вырашылі падзяліцца на дзве падгрупы: адна — палітычная, другая — ваенная.

Як паведаміла РБК-Украіна інфармаваная крыніца, знаёмая з падрабязнасцямі перамоў, па палітычнай секцыі істотнага прагрэсу дасягнуць не ўдалося.

Што вядома пра пазіцыі бакоў

Украіна настойвае, што тэрытарыяльнае пытанне можна абмяркоўваць, адштурхоўваючыся як мінімум ад бягучай лініі судакранання, у той час як расіяне працягваюць заяўляць пра неабходнасць вываду Украінай сваіх войскаў з неакупаванай часткі Данецкай вобласці.

У чым удалося прасунуцца

«Аднак на вайсковай падгрупе бакам удалося прасунуцца. Абмяркоўваліся пытанні, ці патрэбна развядзенне сіл, як будзе адбывацца маніторынг спынення баявых дзеянняў і спынення агню, стварэнне цэнтра па кантролі і каардынацыі пытанняў спынення агню і якія краіны там могуць быць прадстаўлены», — удакладніла крыніца.

Паводле яе слоў, вайсковая падгрупа дамовілася цягам тыдня — да наступнай сустрэчы — падрыхтаваць вызначэнне тэрмінаў: таго, што будзе трактавацца як рэжым спынення баявых дзеянняў, рэжым спынення агню, што лічыць іх парушэннем і таму падобнае. На наступнай сустрэчы перамоўнікі павінны абмяняцца гэтымі дэфініцыямі.

Маніторынг выканання пагаднення

Акрамя таго, паводле інфармацыі выдання, расійская дэлегацыя спачатку заявіла, што не жадае, каб да маніторынгу і цэнтру кантролю былі прыцягнутыя ні НАТА, ні АБСЕ, ні еўрапейскія краіны, якія падтрымліваюць Украіну падчас вайны.

«На гэта Дрыскол у іх спытаў: “вы ж ведаеце, што значная частка рэсурсаў для Украіны ідзе з ЗША, а калі мы будзем удзельнічаць у маніторынгу, то што?” Расіяне задумаліся і адказваюць: “так, паміж нашымі прэзідэнтамі склаліся даверлівыя адносіны, таму мы не супраць, давайце”. Затым падобнае пытанне задаў Грынкевіч наконт цэнтра кантролю. Увогуле, расіяне хочуць, каб у маніторынгу ўдзельнічалі толькі яны, мы і ЗША», — дадала крыніца.

У паведамленні ўдакладняецца, што бакі дамовіліся — у тых жа падгрупах — працягнуць перамовы прыблізна праз тыдзень.