На галоўнай базе Паўночнага флоту Расіі адбылося надзвычайнае здарэнне
- 24.01.2026, 13:48
Яно закранула ўсю Мурманскую вобласць.
У закрытым горадзе Севераморск Мурманскай вобласці, дзе знаходзіцца галоўная ваенна-марская база Паўночнага флоту РФ, у выніку абрушэння пяці апор ЛЭП на лініях «Расеты» адключылася электраэнергія, ваенныя караблі перавялі на аварыйныя генератары.
«Працуем у звязцы з РЭС «Севераморскі» і Паўночным флотам. Для вызвалення магутнасцяў адключана вулічнае асвятленне, караблі пераведзены на аўтаномны рэжым энергазабеспячэння», — паведаміў раніцай 24 студзеня кіраўнік горада Уладзімір Еўменькаў. Ён таксама заклікаў гараджан «максімальна знізіць электраспажыванне ў кватэрах» на перыяд правядзення рамонтных прац.
Блэкаўт таксама адбыўся ў Мурманску, паведамляў увечары ў пятніцу губернатар рэгіёна Андрэй Чыбіс, які склікаў пасяджэнне аператыўнага штаба. Па яго распараджэнні ў вобласці быў уведзены рэжым падвышанай гатоўнасці пры НС. Раніцай у суботу кіраўнік рэгіёна заявіў, што з-за «сур'ёзнага пашкоджання пяці апор» энергазабеспячэнне змогуць аднавіць не раней чым праз суткі. Ён папрасіў жыхароў «паставіцца з разуменнем» да ўзніклых цяжкасцяў і па магчымасці абмежаваць выкарыстанне электрапрыбораў і тэхнікі.
У выніку адключэння сілкавання ў абодвух гарадах таксама назіраюцца збоі з падачай ацяплення і гарачай вады, вынікае з паведамленняў уладаў. Паводле звестак Еўменькава, гэта, у прыватнасці, закранула жыхароў пасёлкаў Сафонава, Сафонава-1 і мікрараёна Корцік у Севераморску — там прыпыняліся катэльні. У шэрагу гарадскіх школ, дзіцячых садкоў і ў двух дамах культуры адкрыты пункты абагрэву.
У «Расетах» паведамілі, што да абрушэння апор прывялі снегапад, шквалісты вецер, а таксама іній на правадах і саміх збудаваннях. «На працягу ночы энергазабеспячэнне часткі абясточаных спажыўцоў удалося аднавіць, у тым ліку сацыяльна значных аб'ектаў, з прыцягненнем рэзервовых крыніц. Працягваецца мантаж канструкцый для замены пашкоджаных апор ЛЭП», — заявілі ў кампаніі. Да гэтага Чыбіс паведамляў пра дастаўку новых апор з Ленабласці і Карэліі.
Па факце маштабнага блэкаўту ў населеных пунктах Мурманскай вобласці ўзбуджана крымінальная справа па артыкуле аб нядбайнасці (ч. 1 арт. 293 КК РФ), паведамілі ў рэгіянальным упраўленні СК РФ.
У пункце базіравання Севераморск размешчана 43-я дывізія ракетных караблёў і некалькі брыгад ВМФ. У іх склад уваходзяць, у тым ліку, цяжкі авіянясучы крэйсер «Адмірал флоту Савецкага Саюза Кузняцоў», цяжкі атамны ракетны крэйсер «Пётр Вялікі», а таксама некалькі эсмінцаў, фрэгатаў і вялікіх супрацьлодкавых караблёў.