ЗША абвясцілі новыя санкцыі супраць іранскага «ценявага флоту»

• 23.01.2026, 22:25

Вашынгтон узмацняе ціск на Тэгеран.

Пра гэта паведаміла Міністэрства фінансаў ЗША.

У Мінфіне ЗША заявілі, што санкцыі закрануць дзевяць суднаў «ценявага флоту» Ірана, а таксама кампаній, якія імі валодаюць.

Усю маёмасць і актывы падсанкцыйных юрыдычных і фізічных асоб, што знаходзяцца ў Злучаных Штатах або ва ўладанні ці пад кантролем асоб ЗША, будуць заблакаваныя.

У Міністэрстве фінансаў ЗША дадалі, што абмежаванні накіраваныя на змяншэнне даходаў іранскага рэжыму.

«Гэты даход, які па праве належыць іранскаму народу, замест гэтага накіроўваецца на фінансаванне рэгіянальных тэрарыстычных пасярэднікаў, праграм узбраення і службаў бяспекі, а не на базавыя эканамічныя паслугі, якіх смела патрабаваў іранскі народ», — гаворыцца на сайце.

На мінулым тыдні адміністрацыя ЗША абвясціла пра пакет санкцый супраць Ірана, які быў накіраваны на асоб, што кіравалі жорсткім падаўленнем антыўрадавых пратэстаў у краіне.