Фанатам «Бруге» далі 5 сутак арышту за касцюмы ў стылі «Барата» ў Астане

• 23.01.2026, 3:46

У Казахстане гэта палічылі непавагай да навакольных і дробным хуліганствам.

Тры балельшчыкі бельгійскага «Бруге», якія з'явіліся на матчы з «Кайратам» у Астане ў купальніках у стылі камедыі «Барат» (манкіні), атрымалі па пяць сутак арышту, паведамляе Vesti.kz.

Матч агульнага этапу Лігі чэмпіёнаў адбыўся 20 студзеня і скончыўся разгромам «Кайрата» з лікам 1:4. Пасля гульні ў Дэпартаменце паліцыі Астаны паведамілі, што «трое мужчын учынілі дзеянні, якія выяўляюць непавагу да навакольных і парушаюць грамадскі парадак». Іх затрымалі за дробнае хуліганства і з'яўленне ў грамадскім месцы ў стане ап'янення.

«Людзі прыцягнутыя да адміністрацыйнай адказнасці. Ёсць рашэнне суда аб іх адміністрацыйным арышце на пяць сутак», — заявіў намеснік міністра ўнутраных спраў Казахстана Санжар Адылаў.

У судзе паведамілі Tengrinews, што балельшчыкі на пасяджэнні прызналі сваю віну, растлумачыўшы такія паводзіны эмоцыямі.

Усяго на матч у Астану адправіліся каля 500 фанатаў «Бруге».

У МЗС Бельгіі паведамілі, што сочаць за сітуацыяй, піша Reuters.

«Барат: культурныя даследаванні Амерыкі на карысць слаўнай дзяржавы Казахстан» — чорная камедыя 2006 года з Сашам Баронам Коэнам. Ён сыграў выдуманага казахстанскага журналіста, які прыехаў у ЗША. У адным з эпізодаў Коэн з'яўляецца ў мужчынскім ярка-зялёным слінг-купальніку (манкіні) з лямкамі на плячах — гэты вобраз хутка стаў мемам. Фільм быў забаронены да пракату ў Казахстане, пазней стаўленне да яго змякчылася з-за станоўчага ўплыву на турпаток.