У Беларусі змяняюцца правілы праходжання тэхагляду

• 21.01.2026, 22:51

Папяровы «дазвол» сыходзіць у гісторыю.

З 11 лютага 2026 года ў Беларусі ўступаюць у сілу новыя правілы праходжання тэхагляду. Навацыі ўводзяцца ў сувязі з зацвярджэннем указа дыктатара № 5 ад 9 студзеня 2026 года, паведамілі ў «Белтэхаглядзе».

Ключавой навіной у сферы тэхагляду стане поўная адмова ад папяровага «дазволу». Цяпер кіроўцам не трэба будзе атрымліваць фізічны дакумент на дыягнастычнай станцыі або вазіць яго з сабой. Усе даныя пра праходжанне тэхагляду будуць аўтаматычна ўносіцца ў электронную сістэму адразу пасля паспяховага завяршэння працэдуры.

Таксама адмяняецца патрабаванне прадстаўляць пацвярджэнне аплаты тэхагляду. Аплачваць паслугу, як і раней, трэба праз сістэму АРІП, але прад’яўляць чэк на станцыі не спатрэбіцца. Сістэма сінхранізаваная з плацяжамі — электронны дазвол з’явіцца толькі пасля паступлення грошай.

Інспектары ДАІ ад цяпер атрымаюць доступ да абноўленай інфармацыйнай сістэмы, дзе змогуць правяраць актуальнасць тэхагляду любога транспартнага сродку. Пры прыпыненні аўтамабіля супрацоўнік будзе бачыць у базе даных, ці прайшоў аўтамабіль тэхагляд і калі заканчваецца тэрмін яго дзеяння. Папяровыя дакументы больш не спатрэбяцца.

Для тых, хто па звычцы захоча атрымаць папяровае пацвярджэнне, такая магчымасць захаваецца на некаторых дыягнастычных станцыях. Аднак гэта будзе дадатковая паслуга, а не абавязковае патрабаванне.

Разам з лічбавізацыяй асноўнага працэсу «Белтэхагляд» таксама пашырае пералік сваіх паслуг. Цяпер на станцыях прапануецца комплексная дыягностыка аўтамабіляў, уключаючы перадпродажную экспертызу.

Гэта паслуга будзе асабліва важная для пакупнікоў ужываных аўтамабіляў. Яна дазволіць атрымаць прафесійную ацэнку тэхнічнага стану транспартнага сродку перад купляй.