Удзельнікі Давоскага форуму асвісталі міністра гандлю ЗША
- 21.01.2026, 15:57
А выступленне прэм’ер-міністра Канады сустрэлі авацыяй.
Удзельнікі вячэры ў аўторак на Сусветным эканамічным форуме ў Давосе (СЭФ) асвісталі міністра гандлю ЗША Гаўарда Латніка, паведамляе Financial Times са спасылкай на ўдзельнікаў мерапрыемства.
Вячэра была арганізаваная Лары Фінкам, генеральным дырэктарам найбуйнейшай кіруючай кампаніі свету BlackRock, які часова стаў сустаршынём СЭФ пасля скандалу з яго заснавальнікам Клаўсам Швабам. Рэзкія выказванні Латніка выклікалі адкрытае абурэнне, многія пачалі яго асвістваць, некаторыя госці сышлі, а Фінку давялося заклікаць да спакою, піша FT.
У аўторак у газеце выйшла калонка Латніка, дзе ён піша: «Мы едзем у Давос не для таго, каб падтрымліваць статус-кво. Мы едзем, каб кінуць яму адкрыты выклік». На гэтым форуме амерыканская дэлегацыя будзе найбуйнейшай па колькасці з пачатку 1970-х гадоў, калі саміт пачалі праводзіць. Латнік тлумачыць, чаму: «Мы тут у Давосе, каб ясна даць зразумець: з прэзідэнтам Трампам у капіталізму з’явіўся новы шэрыф… Пад кіраўніцтвам прэзідэнта Доналда Трампа мы рухаемся ў новым кірунку. Яго адміністрацыя ставіць Амерыку на першае месца… Мы едзем у Давос не для таго, каб упісацца ў агульную карціну. Мы не просім дазволу і не шукаем ухвалення. Мы тут, каб абвясціць: эпоха «Амерыка ў апошнюю чаргу» скончылася».
У Еўропе расце ўсведамленне, што эпоха і праўда заканчваецца — толькі ў іншым сэнсе. «Васьмідзесяцігадовы перыяд атлантызму сапраўды падыходзіць да канца», — заявіў у Давосе прэм’ер-міністр Бельгіі Барт дэ Вевер, дадаўшы, што больш не лічыць ЗША саюзнікам.
У адрозненне ад Латніка, выступленне прэм’ер-міністра Канады Марка Карні ў аўторак сустрэлі авацыяй, адзначае FT. «Дазвольце сказаць наўпрост. Мы знаходзімся ў стане разлому, а не пераходу», — заявіў Карні, гаворачы пра распад заснаванага на правілах сусветнага парадку — працэс, пачаты Уладзімірам Пуціным і працягнуты Доналдам Трампам.
«Нельга «жыць у хлусні» пра ўзаемную выгаду ад інтэграцыі, калі інтэграцыя становіцца крыніцай вашага падпарадкавання», — сказаў Карні, не называючы наўпрост ЗША; прэзідэнт ЗША ў аўторак размясціў у сваёй сацсетцы Truth Social карту, на якой Канада, Грэнландыя і Венесуэла пакрытыя сцягам ЗША.
Карні заклікаў «сярэднія дзяржавы», такія як Канада, супрацоўнічаць адна з адной у гэтай сітуацыі, бо, паводле ягоных слоў, «калі не сядзець за сталом, то трапіш у меню»:
Ностальгія — гэта не стратэгія. Але мы верым, што з разлому мы можам пабудаваць нешта, што будзе большае, лепшае, мацнейшае і больш справядлівае.
Прамова Карні была «праяўленнем сапраўднага лідарства», — напісаў у X Алістэр Кэмпбэл, PR-кансультант былога прэм’ер-міністра Вялікабрытаніі Тоні Блэра. Карл Більдт, сустаршыня Еўрапейскай рады па міжнародных адносінах і былы прэм’ер-міністр Швецыі, назваў прамову «вельмі важнай», а карту Трампа — «папярэджаннем Нерона», маючы на ўвазе імператара, які спаліў Рым.