У Беларусі з'явіўся анамальны цэнтр маразоў

• 21.01.2026, 13:20

Гэты горад шэсць дзён запар трымае рэкорд па маразах.

У Беларусі, верагодна, з'явіўся анамальны цэнтр маразоў — і не на Віцебшчыне. Шосты дзень запар рэкорд па мінусавай тэмпературы ставіць метэастанцыя Клічаў, размешчаная ў гэтым райцэнтры Магілёўскай вобласці, піша Telegram-канал «Метеовайб».

Да 9 раніцы 21 студзеня ў Клічаве зафіксавалі -26,8°С — самая марозная кропка ў Беларусі. Уначы 20 студзеня таксама найхаладней за ўсё было менавіта там, аднак на 1,5°С цяплей — -25,3°С.

Чатыры папярэднія дні рэкорды па холаду ў краіне таксама былі ў Клічаве: -28,1°С, -29,3°С, -26,6°С, -27,8°С. «Даўно ў нас не было такога працяглага перыяду моцных маразоў», — адзначылі ў «Метеовайбе».