Ёсць смутнае падазрэнне, што беларусаў чакае наперадзе нямала сюрпрызаў
- Алеся Матусевіч, «Салідарнасць»
- 21.01.2026, 9:20
Лукашэнка выдаў «каштоўнае» ўказанне.
Аварыя, што здарылася на цеплатрасе ў беларускай сталіцы, чарговы раз яскрава паказала стаўленне Лукашэнкі да «народца». І зусім не ў сэнсе клопату кіраўніка пра падданых.
У студзеньскія маразы пяць раёнаў Мінска засталіся без цяпла і гарачай вады. Энергетыкі абяцалі хутка пачыніць, але ўзніклі аб’ектыўныя складанасці, непрадбачаныя цяжкасці — на другія суткі пасля аварыі па «гарачых лініях» расплывіста адказваюць, што вось сёння ўсё павінны пачыніць. Звычайная, нібыта, сітуацыя. Але не.
Па-першае, акрамя сталіцы, у гэтыя ж марозныя дні аварыі здарылася ў Жодзіне і Барысаве, прарвала водаправодную лінію ў Гомелі. І гэта пры тым, што, як мы памятаем, кожнае лета беларусам на дзве тыдні і болей адключаюць гарачую ваду менавіта дзеля гэтага — правесці прафілактыку і падрыхтаваць сістэмы цеплазабеспячэння да ацяпляльнага сезона. Каб пазбегнуць аварый і перабояў.
І кожную зіму — яны здараюцца. Атрымліваецца, што рамантуюць не тое, або не там, або не так, як трэба, зыходзячы з беднага і ўрэзанага, мякка кажучы, вечна недафінансаванага стану жыллёва-камунальнай гаспадаркі? Як паказушнае «наведзенне парадку» ў гаспадарках да 7 лістапада.
Ці як ямачны рамонт на дарогах — «латаюць» штогод, нярэдка, як падмечаюць жыхары, у тых жа самых месцах. А стан многіх, асабліва вясковых, дарог, калі гэта не траса М1 і не дарога да рэзідэнцыі кіраўніка, пакідае жадаць лепшага.
Па-другое, паказальная рэакцыя ўладаў. Аляксандр Лукашэнка, як ён гэта любіць, ні з таго ні з сяго выказаўся на сустрэчы з губернатарам Кіраўскай вобласці РФ, маўляў, аж спаць не можа — так перажывае ў маразы за стан цеплатрас.
— Кажуць, дзесьці там пад Мінскам нешта пад раніцу пачало даваць уцечку. Цеплатраса — падвысілі ціск… Як звычайна. І я падумаў тры дні таму: думаю, трэба папярэдзіць начальнікаў, — цытуе кіраўніка БелТА.
Хворыя каленкі, канечне, маглі «прадказаць» Лукашэнку пахаладанне, але адразу напрошваецца пытанне — калі адчуваў непакой загадзя, дык чаму ж не прадухіліў, так бы мовіць, не папярэдзіў энергетыкаў?
Расперэжываўся, што беларусы ўспомняць яго ж сцверджанне, што гэта асабіста ён, маўляў, папрасіў вышэйшыя сілы, «каб быў марозік і снег выпаў»? Ці, упіваючыся ўласным красамоўствам і значнасцю, часам не да логікі?
З лёту Лукашэнка выдаў каштоўнае ўказанне: ваду ў трубах грэць паменш і ціск панізіць, будзе «не 25, а 20 градусаў — дастаткова ў доме».
Што характэрна, у Мінэнерга тут жа адрапартавалі, што «прымуць меры» (быццам сярод энергетыкаў і ў Міністэрстве жыллёва-камунальнай гаспадаркі сядзяць суцэль ідыёты, якія не змаглі б дзейнічаць без мудрай падказкі).
Словы Лукашэнкі — чарговы прыклад яго фірмовага цынізму і пагарды да патрэбаў людзей. Нават дзіўна, што гэты раз не згадаў, маўляў, «ціктокаюцца, скардзяцца» — толькі знісходліва распарадзіўся «не перабарашчваць з тэмпературай». Не цукровыя ж беларусы, пацерпяць, падумаеш.
Як быццам гаворка толькі пра кватэры і «нежнак», а не пра тое, што ў пацярпелых раёнах — дзіцячыя сады, школы, паліклінікі і бальніцы.
Як быццам нам не вядома лепш, чым каму, што нават у межах аднаго горада з ацяпленнем творыцца поўны бардак: у адным раёне па кватэры ходзяць у кофтах і бабуліных шкарпэтках, у другім — раздзюцца да футболкі, бо «жарыць як у Ташкенце». Хаця паводле нормаў павінна быць ад 18 да 24 градусаў.
Як быццам праблемы вычэрпваюцца толькі халоднымі батарэямі, а не ўзрослай нагрузкай на электрасеткі (абагравальнікі ў крамах разабралі, многія пішуць у сацсетках, што «грэліся ад пліты»), а таксама сухім паветрам у доме і марозным смогам на вуліцы, што можа быць небяспечным для здароўя (МНС і медыкі параілі не адчыняць вокнаў і доўга не гуляць на вуліцы).
Нарэшце, як быццам гэта наогул нармальна — што, у адрозненне ад Кіева, дзе людзі засталіся без святла і цяпла з-за расійскіх бамбаванняў, у мірнай Беларусі то і справа адбываюцца камунальныя аварыі, і сфера ЖКГ, здаецца, літаральна трэшчыць па швах.
Пры тым грамадзяне ўвесь час справна плацяць за камунальныя паслугі, а ўлады толькі паўтараюць, што мы недаплачваем.
Паводле слоў Лукашэнкі, «мы ж славянскія людзі, умеем гэта рабіць: праблемы сабе стварыць, а потым іх гераічна пераадольваць». Але ж справа ў тым, што — не мы, а вы.
Эканомія на жыллёва-камунальнай сферы ў шкоду якасці паслуг, ігнараванне назапашаных праблем, звычка да паказухі і прымусовых «суботнікаў» — гэта лукашэнкаўскі стыль, які ўся яго вертыкаль увабрала ў сябе зверху данізу.
І ёсць такое смутнае падазрэнне, што пераходзіць у ўпэўненасць, што беларусаў чакае наперадзе нямала такіх жа непрыемных сюрпрызаў з наступным ударным разгрэбаннем наступстваў. І парадамі з серыі «зрабіць тэмпературу паменш», «харчавацца больш сціпла», «пацярпець і не ныць».
P.S. Маразы, паводле прагнозаў сіноптыкаў, у найбліжэйшыя дні яшчэ не адступяць.
Алеся Матусевіч, «Салідарнасць»