Трамп назваў прычыну, чаму не можа завяршыць вайну ва Украіне

• 21.01.2026, 8:13

Прэзідэнт ЗША заявіў, што робіць гэта не дзеля Нобелеўскай прэміі міру.

Прэзідэнт ЗША Дональд Трамп патлумачыў, чаму не можа скончыць вайну ва Украіне. Паводле яго слоў, калі адзін бок гатовы да завяршэння, то другі, наадварот, не гатовы.

Пра гэта паведамляе Белы дом.

Падчас выступлення ў Белым доме Трамп у чарговы раз заявіў, што ўжо скончыў 8 войнаў, дадаўшы, што ні адзін прэзідэнт не ўрэгуляваў нават адну вайну.

«Не ведаю, падумайце пра гэта. Я (скончыў - рэд.) восем. Я раблю гэта, таму што мне гэта лёгка даецца. І я рабіў гэта не дзеля Нобелеўскай прэміі. Я рабіў гэта, бо ратую мноства жыццяў», - сказаў прэзідэнт ЗША.

Ён дадаў, што спрабуе завяршыць апошні канфлікт, маючы на ўвазе расійска-ўкраінскую вайну. У сваёй прамове Трамп патлумачыў, чаму дагэтуль не змог гэтага зрабіць.

«Я спрабую ўрэгуляваць апошні канфлікт. Я спрабую вырашыць пытанне Расіі і Украіны. І калі Расія гатовая - Украіна не гатовая. Калі Украіна гатовая - Расія не гатовая. Але ў сярэднім яны страчваюць па 25 000 чалавек у месяц. І я стараюся давесці гэтую справу да канца», - падсумаваў Трамп.