У ЗША праз снегапад сутыкнуліся больш за 100 аўтамабіляў

• 20.01.2026, 20:52

Відэафакт.

У штаце Мічыган (ЗША) больш за 100 аўтамабіляў трапілі ў ДТЗ праз моцны снегапад 19 студзеня. Пра гэта паведаміла Associated Press.

У маштабную аварыю трапілі, у прыватнасці, больш за 30 грузавікоў з паўпрычэпамі.

Паліцыя штата Мічыган паведаміла пра пацярпелых, аднак дакладная колькасць пакуль невядомая, смяротныя выпадкі не зафіксаваныя. Дарогу закрылі на некалькі гадзін для прыбірання і эвакуацыі аўтамабіляў. Частку кіроўцаў і пасажыраў, якія апынуліся заблакаванымі, даставілі школьнымі аўтобусамі ў Hudsonville High School, дзе яны маглі звярнуцца па дапамогу.

Паводле слоў сведкаў здарэння, бачнасць на дарозе была амаль нулявая з-за снегападу і моцнага ветру. Адзін з кіроўцаў распавёў, што рухаўся са хуткасцю 20–25 міль у гадзіну (32–40 км/г), спыніўся і з'ехаў на абочыну, каб пазбегнуць удара ззаду.

Аварыя стала адным з наступстваў буйной зімовай буры, якая ахапіла многія цэнтральныя і ўсходнія штаты ЗША, з папярэджаннямі пра моцныя снегапады і маразы. Днём раней снег выпаў нават у Фларыдзе, а на футбольных матчах у Масачусэтсе і Чыкага ён ускладняў гульню.