Беларусаў папрасілі не ўключаць у адну разетку некалькі прыбораў

• 20.01.2026, 17:55

У чым справа?

Беларусаў папрасілі не ўключаць у адну разетку некалькі прыбораў, каб не дапусціць перагрузкі электрычнай сеткі. Гэтая праблема з прыходам моцных маразоў традыцыйна абвастраецца, бо многія пачынаюць актыўна карыстацца абагравальнікамі. Вось пра што варта памятаць, перш чым уключаць абагравальнік у разетку.

Парады далі ў афіцыйным Telegram-канале старшыні Гомельскага гарвыканкама. У кожнага электрапрыбора ёсць уласная мінімальная магутнасць электрычнай сеткі, неабходная для яго поўнацэннай працы:

- камп’ютару ў сярэднім патрабуецца 1 кВт,

- пыласосу - каля 0,8 кВт,

- электрачайніку - у сярэднім 1,2 кВт,

- мікрахвалёўцы - каля 1,5 кВт,

- абагравальніку - тыя ж 1,5 кВт.

Калі ўключыць усе гэтыя прыборы адразу, у адну разетку, нават выкарыстоўваючы падаўжальнік, спатрэбіцца магутнасць каля 6 кВт. Калі вы не ўпэўнены, што электрычны кабель, які сілкуе гэтую разетку, разлічаны на такую магутнасць, рабіць гэтага ні ў якім разе нельга.

- У гэтым выпадку токаправодзячая жыла кабеля моцна награваецца. Ад высокай тэмпературы пачынае пашкоджвацца ізаляцыя электраправодкі, а сам метал пачынае губляць свае першапачатковыя ўласцівасці праводзіць ток, - апісалі наступствы такой празмернай нагрузкі на сетку спецыялісты.

Так, наступствы могуць выявіцца не адразу, але рана ці позна апошняя кропля абавязкова ўпадзе і гэта можа абярнуцца кароткім замыканнем і сур’ёзным пажарам.

Вось найважнейшыя рэкамендацыі спецыялістаў:

- не ўключаць некалькі прыбораў у адну разетку або падаўжальнік;

- выкарыстоўваць толькі спраўныя падаўжальнікі і сеткавыя фільтры;

- не пакідаць абагравальнікі без нагляду, асабліва на ноч;

- кантраляваць стан праводкі ў доме (павінен насцярожыць пах гару, нагрэў разетак або мігценне лямпачак);

- не выкарыстоўваць самаробныя або пашкоджаныя электрапрыборы.