Reuters: Далёкі Усход Расіі накрыла снегам

• 20.01.2026, 17:01

Гэта самы моцны снегапад у рэгіёне за апошнія 60 гадоў.

Моцны зімовы цыклон накрыў Азію, выклікаўшы рэкордныя снегапады на Далёкім Усходзе Расіі і сур’ёзныя перабоі ў транспарце ў Кітаі і Японіі. Паводле звестак метэаролагаў, гэта самы моцны снегапад у рэгіёне за апошнія 60 гадоў, піша агенцтва Reuters (пераклад — сайт Charter97.org).

На Камчатцы снегавыя гурбы вышынёй у некалькі метраў заблакавалі ўваходы ў будынкі і засыпалі аўтамабілі. У шэрагу раёнаў за першую палову студзеня выпала больш за два метры снегу, а ў снежні — яшчэ каля 3,7 метра. У Петрапаўлаўску-Камчацкім жыхары вымушаныя пракопваць вузкія праходы да пад’ездаў, а пазадарожнікі з цяжкасцю перасоўваюцца па вуліцах або і зусім застываюць.

Вучоныя звязваюць экстрэмальнае надвор’е з хвалямі халоднага паветра, якія ідуць з Арктыкі з-за аслаблення палярнага віхру. Паводле слоў клімолагаў, гэта прыводзіць да рэзкіх пахаладанняў адначасова ва ўсходняй частцы Расіі, у Азіі і ва Усходняй Еўропе.

Халодны фронт дайшоў і да Кітая. У Шанхаі, дзе моцны снег апошні раз фіксавалі ў 2018 годзе, выпаў рэдкі снег, нягледзячы на тое, што ўсяго тыдзень таму тэмпература дасягала +20 °C. Рэзкія перапады тэмпературы закранулі таксама правінцыі на поўдзень ад Янцзы, уключаючы Цзянсі і Гуйчжоу. Улады закрылі ўчасткі аўтамагістраляў у 12 правінцыях з-за галалёду і снегападаў.

У Японіі моцны снег і вецер парушылі авіязносіны на паўночным захадзе краіны. Авіякампаніі ANA і Japan Airlines адмянілі дзясяткі рэйсаў, асабліва ў раёне аэрапорта Сін-Чытосэ на Хакайда. Метэаслужба заклікала жыхароў устрымацца ад неабавязковых паездак у найбліжэйшыя дні.