Кім Чэн Ын зладзіў паказуху ў стылі Лукашэнкі

• 20.01.2026, 14:29

Інцыдэнт адбыўся на фоне эканамічнага крызісу ў КНДР.

Лідар КНДР Кім Чэн Ын падчас інспекцыі буйнага прамысловага аб'екта публічна звольніў віцэ-прэм'ера, які курыраваў эканоміку, абвінаваціўшы яго ў некампетэнтнасці і правале пастаўленых задач, піша Independent.

Інцыдэнт адбыўся на Рэнсонскім машынабудаўнічым комплексе ў правінцыі Хамгён, дзе Кім Чэн Ын правяраў першы этап мадэрнізацыі прадпрыемства. Ён рэзка раскрытыкаваў чыноўнікаў за зрыў тэрмінаў, назваўшы іх працу безадказнай і паражэнскай. Віцэ-прэм'ер Ян Сон Хо быў адпраўлены ў адстаўку як «непрыдатны для выканання цяжкіх абавязкаў».

Кім Чэн Ын вобразна заявіў, што прызначэнне Яна Сона Хо было «падобным на спробу запрэгчы воз у казла», падкрэсліўшы, што «воз цягне вал, а не казёл».

Эксперты адзначаюць, што эканоміка Паўночнай Карэі працягвае адчуваць сур'ёзныя цяжкасці з-за міжнародных санкцый, хранічна неэфектыўнага кіравання, слабой інфраструктуры і недахопу харчоў. Пры гэтым значная частка рэсурсаў па-ранейшаму накіроўваецца на ваенныя і ракетныя праграмы.

Аналітыкі лічаць, што публічнае звальненне хутчэй з'яўляецца дэманстратыўнай мерай ціску на эліты напярэдадні партыйнага з'езда, чым прыкметай рэальных эканамічных рэформаў.

Заўважым, што падобным стылем камунікацыі з чыноўнікамі часта карыстаецца Аляксандр Лукашэнка.