Што вядома пра Міхаіла Фёдарава, які можа ўзначаліць Мінабароны Украіны

• 2.01.2026, 23:21

34-гадовы айцішнік ініцыяваў і рэалізаваў шэраг важных для Украіны праектаў.

Першы віцэ-прэм’ер, міністр лічбавай трансфармацыі Украіны Міхаіл Фёдараў можа ўзначаліць Міністэрства абароны Украіны.

Пра гэта паведамляе Charter97.org са спасылкай на вячэрні зварот прэзідэнта Украіны Уладзіміра Зяленскага.

«Новым міністрам абароны Украіны я прапанаваў стаць Міхаілу Фёдараву. Ён паглыблена займаецца пытаннем «Лініі дронаў», вынікова працуе над лічбавізацыяй дзяржаўных паслуг і працэсаў», — адзначыў Зяленскі.

Паводле яго слоў, цяпер неабходна рэалізаваць у сферы абароны такія змены, «якія дапамогуць».

Што вядома пра Міхаіла Фёдарава

Міхаіл Фёдараў нарадзіўся 21 студзеня 1991 года ў горадзе Васілёўка Запарожскай вобласці.

Вышэйшую адукацыю атрымаў у Запарожскім нацыянальным універсітэце, дзе скончыў факультэт сацыялогіі і кіравання па спецыяльнасці «сацыялогія».

Да прыходу ў дзяржаўную ўладу Фёдараў займаўся прадпрымальніцкай і праектнай дзейнасцю ў сферы лічбавых камунікацый і маркетынгу.

У 2019 годзе ён стаў кіраўніком лічбавага напрамку перадвыбарчай кампаніі Уладзіміра Зяленскага, пасля чаго быў прызначаны віцэ-прэм’ер-міністрам — міністрам лічбавай трансфармацыі Украіны.

На гэтай пасадзе Фёдараў курыруе развіццё электроннага ўрада, лічбавых дзяржаўных паслуг і ўкараненне інавацыйных тэхналогій у публічным сектары.

У 2023 годзе Міхаіл Фёдараў быў прызначаны першым віцэ-прэм’ерам Украіны, міністрам па інавацыях, развіцці адукацыі, навукі і тэхналогій Украіны.

Ужо ў ліпені 2025 года Фёдараў заняў пасаду першага віцэ-прэм’ера, міністра лічбавай трансфармацыі Украіны.

За сваю дзейнасць Фёдараў атрымаў мноства міжнародных узнагарод і ўваходзіў у рэйтынгі Forbes «30 да 30» і TIME100 Next. З 2023 года ён з’яўляецца членам Стаўкі Вярхоўнага Галоўнакамандуючага Украіны.