Ва Украіне зменяць кіраўніка Дзяржаўнай памежнай службы

• 2.01.2026, 19:09

Сяргей Дейнеко атрымае новую пасаду.

Ва Украіне плануюць змяніць падыходы ў працы Дзяржаўнай памежнай службы. Замест Сяргея Дейнеко будзе прызначаны новы кіраўнік ДПСУ.

Пра гэта паведамляе Charter97.org са спасылкай на прэзідэнта Украіны Уладзіміра Зяленскага ў Telegram.

Кіраўнік дзяржавы расказаў, што яму дакладаў міністр унутраных спраў Ігар Кліменка. Асобна было абмеркавана пытанне дзейнасці Дзяржаўнай памежнай службы.

Паводле слоў Зяленскага, на працягу больш як шасці гадоў пад кіраўніцтвам Сяргея Дейнеко ДПСУ прайшла значны шлях развіцця і ўмацавання. І цяпер падраздзяленні памежнікаў разам з іншымі складнікамі Сіл абароны ваююць на перадавой. Таксама была значна ўзмоцнена ахова ўчасткаў мяжы Украіны з РФ і Беларуссю.

«У той жа час ёсць задачы па змяненні падыходаў у працы ДПСУ. Пра гэта гаварылі і з Сяргеем. У бліжэйшы час міністр Кліменка прадставіць кандыдатуры на замену кіраўніка ДПСУ, а Сяргей Дейнеко працягне працу ў сістэме Міністэрства ўнутраных спраў Украіны», — сказаў прэзідэнт.