У Польшчы тэрміны разгляду спраў аб відах на жыхарства замарозяць да сакавіка 2027 года

• 2.01.2026, 18:01

А па міжнароднай абароне — адновяць.

Тэрміны разгляду спраў аб відах на жыхарства ў Польшчы прапануецца замарозіць да 4 сакавіка 2027 года, то бок працягнуць прыпыненне яшчэ на год. А вось для спраў аб міжнароднай абароне «замарозку» працягваць не плануюць. Пра гэта сведчыць апублікаваны праект закона, які рэгулюе дапамогу ўкраінскім бежанцам, паведамляе Most.

Што гаворыцца ў законапраекце

Законапраект чарговы раз замарожвае тэрміны разгляду спраў аб відах на жыхарства і іншых легалізацыйных працэдурах. Дзяржаўныя органы па-ранейшаму будуць прымаць і разглядаць заявы, аднак пры гэтым могуць не прытрымлівацца ўстаноўленых тэрмінаў. Гэтае выключэнне з правілаў было ўведзена на пачатку 2022 года ў сувязі з наплывам украінскіх бежанцаў і неаднаразова падаўжалася. На гэты раз — да 4 сакавіка 2027 года.

Восенню 2025 года аналагічным чынам былі замарожаныя тэрміны разгляду спраў аб міжнароднай абароне. Прыпыненне дзейнічае да 4 сакавіка 2026 года — але працягвацца не будзе. Такім чынам, Упраўленне па справах замежнікаў ізноў павінна будзе прымаць рашэнні на працягу 6 месяцаў, а ў некаторых выпадках — 15 месяцаў.

Што з падаўжэннем дакументаў

З папярэдняга варыянта дакумента вынікала, што некаторыя візы і віды на жыхарства могуць быць падаўжаныя. Але поўны тэкст паказвае, што гэтая норма датычыцца толькі грамадзян Украіны.

Закон уступіць у сілу пасля яго прыняцця парламентам і подпісу прэзідэнта.