Мінздароўе дало беларусам «святочную медыцынскую параду»

• 2.01.2026, 13:13

Медыкі раяць зрабіць 5 крокаў для зніжэння нагрузкі на арганізм.

У прэс-службе Міністэрства аховы здароўя Беларусі 2 студзеня звярнуліся да жыхароў краіны з шэрагам рэкамендацый і парад, як выйсці са святочнага рэжыму з найменшымі стратамі.

У ведамстве прызналі, што навагоднія святы — «гэта час, калі мы дазваляем сабе трохі больш, чым звычайна». Пасля лішняга кавалка торта, пары келіхоў шампанскага або порцыі любімай салаты медыкі параілі зрабіць 5 крокаў, каб знізіць нагрузку на арганізм.

1. Не перагружайце арганізм

«Пасля багатых застолляў нашаму арганізму патрэбны час на аднаўленне, а не рэзкія абмежаванні. Пачніце з правільнага пітнога рэжыму: чыстая вада, травяныя чаі, настой з імбіра і цытрыны», — гаворыцца ў паведамленні Мінздароўя.

2. Зрабіце акцэнт на простыя стравы

Пры гэтым медыкі папрасілі не садзіцца адразу на строгія дыеты.

«Уключыце ў меню гароднінныя супы, лёгкія кашы і тушаную гародніну — яны дапамогуць наладзіць страваванне і не перагрузяць арганізм», — параілі ў Мінздароўі.

3. Скажыце «так» карысным перакусам

Эксперты папрасілі жыхароў Беларусі адразу пасля Новага года адмовіцца ад святочных ласункаў і перайсці на арэхі, ёгурт без цукру або свежую садавіну.

«Яны насыцяць арганізм энергіяй і дапамогуць зменшыць цягу да салодкага», — параілі яны.

4. Аднаўце рэжым

«Познія вячэры і хаатычны графік харчавання — частыя спадарожнікі святаў. Пастарайцеся вярнуцца да рэгулярнага харчавання 3–4 разы на дзень і вячэрайце за 2–3 гадзіны да сну», — гаворыцца ў рэкамендацыі Мінздароўя.

5. Пачніце з невялікай рухальнай актыўнасці

Нават лёгкія прагулкі на свежым паветры не будуць лішнімі.