«Гэта жэсьць»: беларуска паказала селядзец пад футрам з рэстарана сябра Лукашэнкі
- 2.01.2026, 10:16
Цяпер ёй спачуваюць.
Беларуска падзялілася ў Treads кадрамі салаты «Селядзец пад футрам», якую замовіла дадому з мінскага рэстарана Fabriq, частка якога, паводле даных Беларускага расследавальнага цэнтра, належыць звязанаму з Дзмітрыем Лукашэнкам бізнесмену, і адчула расчараванне ў духу «Чаканне і рэальнасць», піша «Зеркало».
Яна падзялілася здымкамі таго, як салата выглядала на рэкламным фота, дзе прапаноўвалася замовіць да навагодняга стала дадому рэстаранныя стравы, і таго, што ў выніку ёй прывезлі. На рэкламным фота пакупнікам абяцалі селядзец пад футрам з чырвонай ікрой, 500 грамаў за 51 рубель, аформлены ў выглядзе тарціка, дзе ікра ляжыць зверху, страва ўпрыгожаная галінкай размарыну. Тое, што даставілі беларусцы дадому, моцна адрознівалася ад таго, што яна бачыла на фота: ружовая маса ў звычайным кантэйнеры, чырвоная ікра — у маленькім пластыкавым кантэйнеры, а галінку размарыну ўвогуле не паклалі.
— Чаканне і рэальнасць за 50 BYN, — напісала яна пад здымкамі і пакінула смайлік, што смяецца.
Карыстальнікі ў каментарыях выказалі ёй спачуванне і падзяліліся меркаваннямі, што рэстаран павінен быў папярэдзіць, што страва можа адрознівацца ад фота:
«А вось селядзец пад футрам з звычайнай кулінарыі так з вамі ніколі б не паступіў».
«Калі шчыра, у «ProStore» сёння выглядала ў сто разоў больш апетытна. І знешні выгляд лепшы і цана, дарэчы, таксама».
«Ну, паводле правілаў гандлю прадавец абавязаны прадаставіць поўную інфармацыю пра тавар, а фота і відэа — усяго толькі частка гэтай інфармацыі. І неадпаведнасць фота — падстава для вяртання. А тут, як бы, розніца відавочная нават з улікам таго, што ікру вам усё ж такі далі. Трэба было, значыць, «Fabriq» пазначыць, што на фота — прыклад сервіроўкі, і ўсё, а то розніцы з купленай у кулінарыі — нуль, акрамя цаны».
«Гэта жэсьць».
«Жэсьць, спачуваю».
«І смешна, і сумна, асабліва за такі прайс. Мне так аднойчы даставілі піцу з Garage: у каробцы была толькі аснова, а кантэйнер з начыннем і зелянінай увогуле забыліся даставіць, але потым, праўда, давезлі яшчэ цэлую».
Таксама ў аўтаркі паста спыталі, што на яе прэтэнзію адказалі ў рэстаране.
— Першапачаткова адказ быў пра тое, што фармат замовы навынос прадугледжвае размяшчэнне стравы ў кантэйнеры для транспартавання. Ікру падаюць асобна, каб яна не пусціла сок на салату. Фотаздымак у інстаграме носіць інфармацыйны характар, гэтак жа як і вага стравы, якая на фота адрозніваецца. Таксама пры замове можна выбраць посуд навынос або размясціць страву ў сваёй пасудзе, тады яна будзе па форме і дэкору адпаведная, — расказала яна.