Аэрапорты Масквы паралізаваныя

• 2.01.2026, 9:50

Рэжым «Кавёр» уведзены над «Шарамецьева», «Внукава», «Дамадзедава» і «Жукоўскім».

У Маскве нібыта зафіксаваная атака невядомых беспілотнікаў, якая прывяла да парушэнняў у працы аэрапортаў і ўвядзення спецыяльнага рэжыму бяспекі. Пра гэта паведамляюць прапагандысцкія СМІ і мэр горада Сяргей Сабянін у Telegram, перадае «Главред».

Мэр сталіцы краіны-агрэсара адзначыў, што на працягу некалькіх гадзін расійская супрацьпаветраная абарона нібыта збівала дроны, якія ляцелі на горад.

«На рахунку ўжо 21 збіты беспілотнік», — паведаміў ён.

Ён дадаў, што на «месцы падзення абломкаў» працуюць спецыялісты экстранных службаў.

Наступствы для аэрапортаў

Паводле даных расійскіх СМІ, з-за здарэння больш за 60 рэйсаў у маскоўскіх аэрапортах былі затрыманыя. Рэжым «Кавёр» уведзены над «Шарамецьева», «Внукава», «Дамадзедава» і «Жукоўскім».

У сеціве з'явілася інфармацыя, што некаторыя пасажыры ўжо шэсць гадзін не могуць вылецець з аэрапорта «Шарамецьева».