Пратэсты ў Іране выйшлі на новы ўзровень

• 2.01.2026, 8:54

Сутыкненні паміж пратэстоўцамі і сіламі рэжыму набіраюць усё большы размах.

У Іране ўжо пятыя суткі запар працягваецца новая хваля пратэстаў з-за рэзкага пагаршэння эканомікі краіны, падзення курсу рыяла і адпаведнага падаражання жыцця. Паводле апошніх звестак, пратэсты распаўсюдзіліся на Керманшах, Ісфахан, Арак, Сабзевар, Хамадан, Карадж і іншыя правінцыі; натоўпы скандуюць антыўрадавыя лозунгі і супрацьстаяць сіламі бяспекі. Паводле асобных заяваў улад краіны і праваабаронцаў, як мінімум дзевяць чалавек загінулі на гэтых пратэстах і некалькі дзясяткаў пацярпелі, піша OBOZ.UA.

Так, падчас нападу на паліцэйскі ўчастак у горадзе Кахдэріджан, што ў правінцыі Ісфахан, загінулі шэсць пратэстоўцаў. Таксама вядома пра смерць аднаго з прадстаўнікоў Корпуса вартавых Ісламскай рэвалюцыі — КВІР разам з сіламі бяспекі спрабуе супрацьстаяць пратэстам.

Што кажа Хаменеі

Вярхоўны лідар Ірана, аятала Алі Хаменеі, абвінаваціў ворагаў ісламу ў распальванні беспарадкаў. Ён таксама заявіў, што звернецца да нацыі з нагоды гэтых падзей, «калі для гэтага настане час».

«У апошнія дні ворагі Ірана выкарыстоўвалі розныя інструменты, у тым ліку грошы, зброю, палітыку і разведвальны апарат, каб ствараць праблемы для нашай Ісламскай Рэспублікі», — сказаў аятала.

Што папярэднічала

Нагадаем, што ў Іране ўспыхнулі пратэсты ў сувязі з рэзкім падзеннем курсу рыяла і імклівым ростам цэн. Першымі на дэманстрацыі выйшлі работнікі гандлю — гандляры на базарах, уладальнікі крамаў і таму падобнае. Пазней да іх далучыліся студэнты ўніверсітэтаў і ўвогуле моладзь.

«Сутыкненні паміж пратэстоўцамі і сіламі бяспекі азначаюць істотную эскалацыю беспарадкаў, якія распаўсюдзіліся па ўсёй краіне з таго часу, як гандляры пачалі пратэставаць супраць дзеянняў урада адносна рэзкага падзення валюты і хуткага росту цэн», — адзначае аўстралійскі вяшчальнік SBS.

Што адбываецца цяпер

Паводле афіцыйных дадзеных з Тэгерана, за апошнія дні толькі ў сталіцы Ірана падчас беспарадкаў было арыштавана больш за 450 чалавек.

Міністэрства разведкі Ірана заявіла, што ўжо выяўлены некалькі «падбухторшчыкаў пратэстаў», «і да іх у бліжэйшы час будуць прынятыя сур'ёзныя меры».

Корпус вартавых Ісламскай рэвалюцыі таксама заклікаў грамадскасць паведамляць пра любыя «падбухторшчыя элементы».