Навукоўцы стварылі робатаў-кролікаў для барацьбы з пітонамі

• 19.01.2026, 11:08

Гэтыя робаты — не проста візуальныя копіі.

Пітоны — майстры маскіроўкі. Нават дасведчаныя спецыялісты з цяжкасцю іх знаходзяць. Паводле некаторых ацэнак, у экасістэме Паўднёвай Фларыды жывуць дзясяткі тысяч змей. Гэта прывяло да скарачэння папуляцый некаторых дробных млекакормячых і птушак, піша Naked Science.

Каб супрацьстаяць нашэсцю пітонаў, спецыялісты з Акругі кіравання воднымі рэсурсамі Паўднёвай Фларыды і Універсітэта Фларыды распрацавалі кролікаў-робатаў. Усяго даследчыкі стварылі 120 прылад, коштам каля чатырох тысяч долараў кожная. Гэтыя робаты — не проста візуальныя копіі кролікаў. Яны выкарыстоўваюць спецыфічныя ўразлівасці сэнсарнай сістэмы бірманскага пітону.

Навукоўцы абсталявалі робатызаваных кролікаў унутранымі награвальнікамі, што імітуюць цеплавую сігнатуру цеплакроўнага млекакормячага. Рухавікі на сонечных батарэях дазваляюць імітаваць характэрныя паддрыгванні жывога кроліка. У сваю чаргу, араматычныя дыфузары выдзяляюць сінтэтычныя пахі, якія актывуюць абаняльныя рэакцыі змяі. Дзякуючы такому мультысенсарнаму падыходу распрацоўшчыкі хацелі справакаваць напад пітонаў на «кроліка».

«Кролікаў» змяшчаюць у невялікія агароджаныя зоны. Спецыялісты могуць дыстанцыйна ўключаць і выключаць іх дзеля эканоміі энергіі. Кожная прылада працуе ў пары з маніторынгавай відэасістэмай, якая папярэджвае біёлага, што пітон выяўлены. Калі сістэма фіксуе набліжэнне або атаку змяі, на месца прыходзіць біёлаг, каб гуманна прыбраць змею.

Эксперты разгарнулі сістэму летам 2025 года. Асноўная мэта праекта — павысіць узровень выяўлення змей і абараніць ад іх мясцовыя віды, што яшчэ захаваліся. Калі праграма будзе паспяховай, у будучыні яна можа стаць узорам прымянення біяміметычнай робататэхнікі для кантролю інвазійных відаў.