У Іспаніі з-за сутыкнення двух цягнікоў загінулі 39 чалавек

• 19.01.2026, 10:07

Яшчэ каля 100 чалавек атрымалі раненні.

У выніку сходу з рэек і сутыкнення двух хуткасных цягнікоў у Іспаніі загінулі 39 чалавек, каля 100 атрымалі раненні, у тым ліку цяжкія. Пра гэта ў ноч на панядзелак, 19 студзеня, паведаміла Міністэрства ўнутраных спраў краіны. Трагедыя адбылася вечарам 18 студзеня ў правінцыі Кардоба, паведамляе «Нямецкая хваля».

Паводле дадзеных ведамства, цягнік кампаніі Iryo, які накіроўваўся з Малагі ў Мадрыд, сышоў з рэек, выехаў на суседні шлях і сутыкнуўся з сустрэчным складам, што накіроўваўся ў Уэльву. Прычыны аварыі пакуль не ўстаноўленыя. Іспанскія СМІ паведамляюць, што ў двух цягніках знаходзіліся каля 400 пасажыраў.

За развіццём сітуацыі сочаць улады краіны. Прэм'ер-міністр Іспаніі Педра Санчэс заявіў, што знаходзіцца на пастаяннай сувязі з экстрэннымі службамі. Спачуванні сем'ям загінулых выказала таксама каралеўская сям'я Іспаніі.

Як перадае агенцтва Reuters, на месцы катастрофы працягваюць працаваць выратавальнікі. Яны спрабуюць знайсці выжыўшых сярод пасажыраў найбольш пацярпелых вагонаў, аднак дакладную колькасць выратаваных пакуль немагчыма ўстанавіць.

Кіраўнік муніцыпалітэта Адамус, паблізу якога адбылася аварыя, распавёў газеце El Pais, што прыбыў на месца адным з першых. Паводле яго слоў, убачаная карціна была жудаснай: адзін з пасажыраў быў знявечаны да неўпазнання.