ISW: Расіян рыхтуюць да важнага рашэння адносна вайны

• 19.01.2026, 8:51

Які сігнал рыхтуе Крэмль.

Крэмль зноў вывеў у публічную прастору былога народнага дэпутата Украіны, кума Пуціна Віктара Медведчука, якога падазраюць у дзяржаўнай здрадзе і шэрагу цяжкіх злачынстваў. Яго нядаўнія заявы пра вайну РФ супраць Украіны скіраваныя на падрыхтоўку расійскага грамадства да адмовы Масквы ад мірнага ўрэгулявання ў агляднай будучыні. Да такой высновы прыйшлі аналітыкі Інстытута вывучэння вайны (ISW).

18 студзеня расійскія прапагандысцкія рэсурсы актыўна тыражавалі інтэрв'ю Медведчука агенцтву ТАСС, у якім ён агучыў шэраг тэзісаў пра вайну. У прыватнасці, ён заявіў, што «міру ва Украіне ў 2026 годзе не будзе», а таксама паўтарыў ключавыя наратывы Крамля пра тое, што «час працуе на Расію» і што Масква мае намер дасягнуць сваіх першапачатковых мэтаў без перамоваў з Кіевам.

Медведчук таксама ўзнаўіў стандартныя крэмлёўскія сцверджанні пра нібыта вайну Расіі з Захадам, «нелегітымнасць» украінскай улады і адхіліў магчымасць правядзення выбараў ва Украіне на любых умовах, акрамя навязаных РФ.

У ISW адзначаюць, што падобная рыторыка даўно выкарыстоўваецца Уладзімірам Пуціным і яго атачэннем для дэманстрацыі прыхільнасці першапачатковым мэтам уварвання і тэорыі «перажывання» Украіны і яе заходніх саюзнікаў — як у вайсковым, так і ў эканамічным вымярэнні.

Аналітыкі падкрэсліваюць, што Крэмль свядома выкарыстоўвае Медведчука як інструмент для агучвання больш радыкальных заяў, якія афіцыйныя асобы РФ не заўсёды гатовыя рабіць наўпрост. Пры гэтым яго словы падаюцца як пазіцыя чалавека, які нібыта прадстаўляе ўкраінскі бок.

Па ацэнцы ISW, галоўная аўдыторыя гэтых заяў — расійскае насельніцтва. Крэмль, верагодна, рыхтуе грамадскую думку да працягнення вайны і адмовы ад мірных ініцыятыў.

«Крэмль, верагодна, выкарыстоўвае інтэрв'ю Медведчука ад 18 студзеня, каб абгрунтаваць адмову Расіі ад мірных намаганняў па ўрэгуляванні вайны ва Украіне», — лічаць аналітыкі.

Заявы Медведчука прагучалі на фоне кансультацый, што працягваюцца, паміж ЗША, ЕС і Украінай па распрацоўцы мірнага плана, а таксама нядаўніх перамоў паміж Кіевам і Вашынгтонам, якія адбыліся 16 студзеня ў Маямі. У ISW перакананыя, што Масква, хутчэй за ўсё, адхіліць любую мірную прапанову, якая не будзе поўнасцю адпавядаць яе максімалісцкім патрабаванням.