Улады Сірыі і курды падпісалі пагадненне аб спыненні агню

• 19.01.2026, 3:00

Мінулымі выхаднымі ўрадавыя войскі Сірыі выціснулі SDF з горада Эт-Табка.

Прэзідэнт Сірыі на пераходны перыяд Ахмед аш-Шараа абвясціў аб заключэнні пагаднення аб рэжыме спынення агню з курдскімі «Сірыйскімі дэмакратычнымі сіламі» (SDF). Пра гэта ў нядзелю, 18 студзеня, паведамляе «Нямецкая хваля».

Дакумент прадугледжвае «ўсеабдымнае і неадкладнае спыненне агню на ўсіх франтах і ва ўсіх кропках судакранання» паміж урадавымі сіламі і SDF.

Пагадненне таксама прадугледжвае інтэграцыю курдскай адміністрацыі і яе сіл у дзяржаўныя структуры, што, як адзначае агенцтва AFP, становіцца сур’ёзным ударам для курдскай меншасці, якая працяглы час імкнулася захаваць фактычную аўтаномію на кантраляваных тэрыторыях.

Аш-Шараа паведаміў пра спыненне агню журналістам, удакладніўшы, што яго сустрэча з камандзірам SDF Мазлюмам Абдзі, запланаваная на 18 студзеня, была перанесеная на 19 студзеня з-за дрэнных умоў надвор’я.

«Каб супакоіць сітуацыю, мы вырашылі падпісаць пагадненне», — заявіў аш-Шараа.

Мінулымі выхаднымі ўрадавыя войскі Сірыі выціснулі SDF з горада Эт-Табка, дзе размешчана плаціна вадасховішча Эль-Асад. На ёй знаходзіцца буйная ГЭС, пабудаваная ў 1970-я пры падтрымцы СССР. Новыя ўлады Сірыі заявілі, што перазапусцяць ГЭС, якую многа гадоў утрымлівалі курды, і забяспечаць электраэнергіяй мясцовых жыхароў.