Ваенныя з Германіі датэрмінова пакінулі Грэнландыю без тлумачэнняў

• 18.01.2026, 15:58

Загад аб вяртанні паступіў сёння раніцай.

Група з 15 вайскоўцаў Бундэсвера нечакана пакінула Грэнландыю і выляцела са сталіцы вострава Нуук. BILD зафіксаваў пасадку нямецкіх афіцэраў і салдат на рэйс авіякампаніі Icelandair. Місія завяршылася раней за запланаваны тэрмін, пры гэтым публічных заяў і афіцыйных тлумачэнняў з боку Берліна не было.

Паводле звестак BILD, загад аб вяртанні паступіў з Германіі сёння рана раніцай. Усе раней запланаваныя сустрэчы і мерапрыемствы былі тэрмінова скасаваныя. Яшчэ напярэдадні кіраўнік групы Штэфан Паулі казаў, што ваенныя чакаюць рашэння Берліна адносна магчымых далейшых крокаў.

Прычыны раптоўнага ад'езду пакуль не названыя. Паводле адной з версій, рашэнне можа быць звязана з абвастрэннем канфлікту вакол Грэнландыі і новымі гандлёвымі пагрозамі з боку прэзідэнта ЗША Дональда Трампа, аднак афіцыйнага пацвярджэння гэтаму няма.

Ваенныя з Германіі прыбылі на востраў толькі некалькі дзён таму ў межах місіі краін НАТА па запрашэнні Даніі.