Італія затрымала судна, якое заходзіла ў Наварасійск

• 17.01.2026, 16:15

З-за парушэння санкцый.

Італьянская фінансавая гвардыя затрымала ў порце Брындзізі судна, якое ішло пад сцягам аднаго з астравоў Акіяніі з грузам у 33 тысячы тон чорных металаў. У лістападзе мінулага года яно заходзіла ў порт Наварасійска. Яго падазраюць у парушэнні санкцый супраць Расіі. Аб гэтым паведамляе выданне Rai News.

«Рэгламент ЕС 833/2014 і наступныя папраўкі прадугледжваюць забарону на камерцыйную дзейнасць у пэўных месцах, уключаючы некаторыя парты Расійскай Федэрацыі, а таксама на імпарт пэўных катэгорый тавараў, роўна як і прымяненне санкцый у дачыненні да шэрагу фізічных і юрыдычных асоб, уключаных у „чорны спіс“», — заявілі праваахоўнікі.

У паведамленні таксама гаворыцца, што ўладальнік судна, кампанія-імпарцёр і некаторыя члены экіпажа знаходзяцца пад следствам за абход санкцый. Судна было затрымана дзякуючы праверцы на мытні: пры вывучэнні дакументаў і дадзеных навігацыйнай сістэмы былі выяўленыя «сур'ёзныя неадпаведнасці, фальсіфікацыі і змены ў бартавой дакументацыі, якая датычыцца месцаў спыненняў і пагрузачных аперацый». Так, было ўстаноўлена, што з 13 па 16 лістапада судна знаходзілася ў Наварасійску, пры гэтым была дэактывавана сістэма AIS, верагодна, каб схаваць гэты факт.