Вялікабрытанія перадала Украіне 350 авіяцыйных ракет ASRAAM

• 17.01.2026, 10:31

Агульны аб’ём дапамогі склаў 4,5 млрд фунтаў стэрлінгаў.

У 2025 годзе Вялікабрытанія выдзеліла 70 млн фунтаў стэрлінгаў на куплю 350 авіяцыйных ракет ASRAAM для Узброеных Сіл Украіны.

Пра гэта паведаміла Міністэрства абароны Украіны.

Паводле даных Мінабароны, сродкі на куплю ракет ASRAAM для Узброеных Сіл Украіны былі накіраваныя ў механізм Extraordinary Revenue Acceleration (ERA), які з’яўляецца ініцыятывай G7. Гэта крэдыты для Украіны, якія пагашаюць за кошт прыбыткаў ад замарожаных расійскіх суверэнных актываў.

У межах ERA у 2024-2025 гадах Кіеў атрымаў ад краін G7 і Еўрасаюза фінансаванне амаль на 28 млрд долараў. У мінулым годзе Лондан таксама перадаў Украіне дзве новыя зенітныя ўстаноўкі Gravehawk.

У фінансаванні гэтага праекта ўдзельнічае таксама Данія. Чакаецца, што ў 2026 годзе на ўзбраенні Узброеных Сіл Украіны з’явяцца яшчэ 16 зенітных установак Gravehawk.

Усяго ж Вялікабрытанія ў мінулым годзе ўнесла ў ініцыятыву ERA 2,26 млрд фунтаў стэрлінгаў. Агульны аб’ём дапамогі Лондана Кіеву ў 2025 годзе склаў 4,5 млрд фунтаў стэрлінгаў.

Раней Лондан за адзін год яшчэ ніколі не аказваў такой значнай фінансавай дапамогі Украіне.

Тактыка-тэхнічныя характарыстыкі ASRAAM

ASRAAM — гэта брытанская авіяцыйная ракета малой далёкасці, якую можна таксама выкарыстоўваць на наземных платформах. Яна мае цеплавізійную галаўку саманавядзення з матрыцай CCD, якая фарміруе інфрачырвоную выяву мэты. Армія Вялікабрытаніі прыняла яе на ўзбраенне ў 2002 годзе. У СМІ сцвярджаюць, што гэтую ракету распрацоўвалі каля 25 гадоў. Даўжыня ракеты складае 2,9 м, дыяметр — 166 мм, а маса — 88 кг. Маса баявой часткі — 10 кг. Далёкасць стральбы — каля 25 км (паводле іншых даных — каля 50 км). Далёкасць стральбы з наземных платформаў — 10 км.