Украіна і ЗША заўтра пачнуць новы раўнд перамоваў у Маямі

• 16.01.2026, 21:47

Названыя дзве ключавыя тэмы.

Украінская і амерыканская дэлегацыі заўтра, 17 студзеня, сустрэнуцца ў Маямі. Яны, у прыватнасці, будуць працаваць над дакументам аб гарантыях бяспекі для Украіны.

Аб гэтым паведаміла пасол Украіны ў ЗША Вольга Стефанішына.

Стефанішына распавяла, што Украіна працягвае актыўныя кансультацыі з ЗША наконт будучай архітэктуры бяспекі і доўгатэрміновага эканамічнага развіцця.

«Заўтра, у Маямі, штат Фларыда, адбудуцца перамовы з удзелам сакратара РНБО Рустэма Умерава, кіраўніка Офіса Прэзідэнта Украіны Кірыла Буданава і кіраўніка парламенцкай фракцыі «Слуга народа» Давіда Арахаміі», — адзначыла яна.

Паводле слоў пасла, Украіна і ЗША працуюць над двума ключавымі дакументамі — пагадненнем аб гарантыях бяспекі і аб эканамічным росквіце Украіны — агульным аб'ёмам да 800 млрд долараў. Такія здзелкі могуць быць падпісаныя на Сусветным эканамічным форуме ў Давосе, які адбудзецца з 19 па 23 студзеня.

— Мэта візіту — дапрацоўка гэтых дамоўленасцяў з амерыканскімі партнёрамі, каб яны як мага больш адпавядалі нацыянальным інтарэсам Украіны, — сказала яна.