Пуціну выкруцяць рукі
- 16.01.2026, 19:28
Аналітык даў прагноз, калі скончыцца вайна ва Украіне.
Для заканчэння поўнамаштабнай вайны ва Украіне ЗША і Кітай будуць ціснуць на Украіну і Расію, аднак для ўсталявання міру патрэбны час на мірныя перамовы, якія зоймуць ад чатырох да шасці месяцаў.
Пра гэта ў інтэрв'ю Telegraf UA расказаў украінскі палітычны аналітик і эксперт па міжнародных працэсах Ігар Тышкевіч.
Паводле яго слоў, цяпер ідуць кансультацыі па «восі» Вашынгтон — Масква і Вашынгтон — Кіеў. Аднак ён даволі скептычна ставіцца да таго, што ў найбліжэйшыя два-тры месяцы ўдасца выйсці на контуры мірнай дамоўленасці, якая будзе прымальнай для ўсіх.
— Першая сустрэча ў Пекіне адбудзецца, хутчэй за ўсё, напрыканцы зімы — на пачатку вясны. Пасля гэтага праз два-тры месяцы адбудзецца сустрэча ў Вашынгтоне, калі туды паляціць Сі. І тут, у залежнасці ад таго, як гэтыя сустрэчы завершацца. Калі яны выходзяць з канфліктам, на мяжы ўзброенай эскалацыі, тады ім выгадна проста замарозіць нашу вайну без усялякіх умоваў. Тады Пекін выкручвае рукі Маскве, Вашынгтон выкручвае рукі нам, — прагназуе палітычны аналітык.
На яго думку, каб не рызыкаваць канфліктам паміж ЗША і Кітаем, Украіну і РФ проста прымусяць спыніць баявыя дзеянні, а ўжо потым разбірацца з заключэннем мірных дамоўленасцяў.
— Калі [ЗША і Кітай] дамовяцца пра сумеснае бачанне контураў пагаднення, якое яшчэ будуць абмяркоўваць некалькі тыдняў, гэта скончыцца тым, што хочам мы ці не хочам, і хоча Пуцін ці не хоча, мы падпісваем па гэтых пунктах, бо адна краіна выкручвае рукі нам, другая — Маскве, — выказаў здагадку эксперт-міжнароднік.
Кажучы пра час перамоваў прэзідэнта ЗША Дональда Трампа і кіраўніка КНР Сі Цзіньпіна, аналітык падкрэсліў, што ёсць некалькі датаў. Першая сустрэча павінна прайсці ў Пекіне.
— Калі яны закранаюць пытанні Украіны, пасля гэтага магчымы пачатак работы працоўных груп дзвюх краін. Гэта — ад некалькіх тыдняў да некалькіх месяцаў. І калі яны паднялі на першай сустрэчы [тэму Украіны] — перад другой сустрэчай могуць дасягнуць пэўнага кампрамісу, нейкага агульнага бачання. Калі першая сустрэча толькі акрэсліла, а працоўныя групы — на другой сустрэчы, тады чакаем паездкі ў Вашынгтон і пасля гэтага ад некалькіх тыдняў да некалькіх месяцаў фармавання сумеснага бачання ЗША і Пекіна і пасля гэтага выкручвання рук і нам, і Пуціну, — падсумаваў Ігар Тышкевіч.