Пад Гомелем судовыя выканаўцы адкапалі з-пад снегу дом і наклалі на яго арышт

• 16.01.2026, 17:28

А што з яго гаспадыняй?

У аграгарадку Ераміна Гомельскага раёна судовыя выканаўцы за даўгі наклалі арышт на дом, уладальніца якога адбывае пакаранне ў Расіі. Будынак давялося адкопваць з-пад снегу, паведамілі ў Галоўным упраўленні юстыцыі Гомельскага аблвыканкама.

Судовыя выканаўцы наклалі арышт на дом у аграгарадку Ераміна. Прымусовае ўскрыццё жылога памяшкання адбылося з удзелам прадстаўнікоў сельсавета і раённага аддзела ўнутраных спраў.

Пусты дом апынуўся грунтоўна занесены снегам, таму супрацоўнікам службаў давялося ўзяцца за лапаты, перадае «Зеркало».

Згодна з рашэннем суда памяшканне ўскрылі без прысутнасці гаспадыні. На дадзены момант яна адбывае пакаранне на тэрыторыі Расіі. Займаючыся прадпрымальніцкай дзейнасцю, жанчына сістэматычна парушала заканадаўства, у выніку чаго ўтварылася запазычанасць у памеры 2 млн расійскіх рублёў (каля 25 тысяч долараў).

У лік пагашэння запазычанасці на яе маёмасць, што знаходзіцца ў Беларусі, накладзены арышт, і яна будзе рэалізаваная на электронных таргах.