Украінскі ВУП вырас на 2,2% у 2025 годзе
- 16.01.2026, 17:25
Нягледзячы на энергетычныя атакі і лагістычныя выклікі.
Міністэрства эканомікі Украіны абнародавала папярэднія даныя аб рэальным ВУП за 2025 год — паказчык вырас на 2,2%. Гэта адбылося ва ўмовах пастаянных атак на энергетычную інфраструктуру і складанай лагістыкі, аднак дзяржаўныя праграмы падтрымкі бізнесу і бюджэтныя інвестыцыі дапамаглі ўтрымаць станоўчую дынаміку, паведамляе Мінэканомікі.
Мінулы год стаў чарговым экзаменам для ўкраінскай эканомікі. Краіна працавала пад ціскам ракетных атак па аб’ектах электрагенерацыі, а ўпершыню за ўвесь перыяд паўнамаштабнай вайны РФ нанесла ўдар па інфраструктуры здабычы газу.
Сярод рухавікоў росту — дзяржаўная праграма «Даступныя крэдыты 5-7-9%», у межах якой прадпрымальнікі атрымалі 93,7 млрд грн новых крэдытаў. У мінулым годзе сума склала 93,1 млрд.
Заробкі ўкраінцаў істотна выраслі. Паводле разлікаў work.ua, сярэдні намінальны заробак па вакансіях на пачатак студзеня 2026 года дасягнуў 27 530 грн — на 30,8% больш, чым год таму. Сярэдні заробак па рэзюмэ падняўся яшчэ вышэй — да 30 216 грн, што на 39,9% перавышае леташні паказчык.
Капітальныя выдаткі зводнага бюджэту на пачатак снежня ўзраслі на 17,3% у параўнанні з аналагічным перыядам папярэдняга года. Праграма «єОселя» забяспечыла ільготнымі іпатэчнымі крэдытамі на суму больш за 14,8 млрд грн, падтрымліваючы будаўнічую галіну.
Сельская гаспадарка сутыкнулася з цяжкасцямі. Ураджай алейных культур скараціўся: соі — на 26,9%, сланечніку — на 15,8%, рапсу — на 7,6%. Цукровых буракоў сабралі на 13,9% менш. Аднак зерневых культур удалося намалаціць на 3% больш.
На запаволенне тэмпаў росту таксама паўплывалі масіраваныя ракетныя атакі РФ па аб’ектах электрагенерацыі і лагістычныя складанасці, спыненне транзіту прыроднага газу трубаправодным транспартам, а таксама звужэнне попыту, у тым ліку з боку сельскай гаспадаркі.
«У 2025 годзе сярод ключавых відаў эканамічнай дзейнасці падтрымалі рост унутраны гандаль, будаўніцтва — дзякуючы праектам аднаўлення, а таксама перапрацоўчая прамысловасць — у прыватнасці вытворчасць абароннай прадукцыі і металургія. Важную ролю адыгралі дзяржаўныя праграмы падтрымкі бізнесу і бюджэтныя інвестыцыі ў аднаўленне крытычнай інфраструктуры», — пракаментаваў сітуацыю міністр эканомікі, навакольнага асяроддзя і сельскай гаспадаркі Аляксей Сабалеў.